News Feature

በጣልያን የተገነባው የግራዚያኒ ሐውልት እንዲፈርስ ውሳኔ ተላለፈ

በጣልያን ላዝዮ ግዛት አፊሌ ከተማ ውስጥ የተገነባው የግራዚያኒ ሐውልት እንዲፈርስ ውሳኔ ተላለፈ፡፡ እንደ ኢትዮጵያ አቆጣጠር ከ1928 እስከ 1933 በነበረው የጣልያን ወረራ ጊዜ፣ በሚሊዬን ለሚቆጠሩ ኢትዮጵያውያን ሞት መንስኤ የሆነው ሮዶልፍ ግራዚያኒ፣ በጣልያን ውስጥ ሐውልት ሊገነባለት አይገባም ተብሎ በፍርድ ቤት ክርክር ሲደረግ ነበር፡፡ ሐውልቱ እንዲፈርስ ላይ ታች ሲል የነበረው ዓለም ዓቀፍ ህብረት ለፍትህ የኢትዮጵያ ጉዳይ የተባለው ተቋም እንደገለጸው ከሆነ፣ የግዛቲቱ ፍርድ ቤት የፋሺስቱ ግራዚያኒ ሐውልት እንዲፈርስ ትዕዛዝ አስተላልፏል፡፡

Graziani (left) is seen here with German Field Marshal Albert Kesselring in October 1944

ከሐውልቱ መፍረስ በተጨማሪ ሐውልቱ እንዲገነባ ያደረጉ የግዛቲቱ የመንግስት አመራሮችም የእስር እና የገንዘብ ቅጣት ተላልፎባቸዋል፡፡ ሐውልቱ የቆመበት የአፊሌ ከተማ ከንቲባን ጨምሮ ሌሎች የከተማዋ የስራ ኃላፊዎች ከ6 እስከ 8 ወር የሚደርስ የእስር ቅጣት የተፈረደባቸው ሲሆን፣ በተመሳሳይም የገንዘብ ቅጣት ተጥሎባቸዋል፡፡ ሮዶልፍ ግራዚያኒ በአምስት ዓመቱ የጣልያን ወረራ ወቅት አንድ ሚሊዬን ኢትዮጵያውያን እንዲሞቱ ምክንያት የሆነ ሰው ነው-ታሪክ እንደመዘገበው፡፡ ከሰዎች በተጨማሪም በሺዎች የሚቆጠሩ እንስሳት ያለቁ ሲሆን፣ በርካታ ቤተ እምነቶች እንዲቃጠሉ ተደርገዋል፡፡

በኢትዮጵያውያን ላይ ጦርነት አውጆ የነበረው ግራዚያኒ በወቅቱ ኢትዮጵያ ውስጥ አሰማርቷቸው የነበሩ ቅጥረኛ ጣልያኖች፣ በኢትዮጵያ ህዝብ ላይ ከፍተኛ ጥፋት አድርሰዋል፡፡ በወቅቱ የነበረው የጣልያን ፋሽስታዊ አስተዳደር፣ ኢትዮጵያን ለመቆጣጠር ለአምስት ዓመታት ትግል ቢያደርግም፣ በመጨረሻ ግን ኢትዮጵያውያን በአንድነት ቆመው በመታገላቸው አይቀጡ ቅጣት ተቀጥቶ ሀገሪቱን ለቅቆ ለመውጣት ተገድዷል፡፡ ግራዚያኒ ከፈጸመው ግድያ እና ወንጀል አንጻር ሐውልት ሊቆምለት አይገባም የሚል ተቃውሞ ከኢትዮጵያውያን በኩል ሲደመጥ ቆይቷል፡፡

ለግራዚያኒ ሐውልት መገንባቱን ተከትሎ ከሶስት ዐመታት በፊት በኢትዮጵያ ውስጥ ተቃውሞ ተደርጎ ነበር፡፡ በወቅቱ የነበረው የሰማያዊ ፓርቲ አመራር በጠራው በዚህ ተቃውሞ ላይ ፐ/ር መስፍን ወ/ማርያምን ሌሎች ፖለቲከኞች እንዲሁም በርካታ ህዝብ ተገኝቶ ነበር፡፡ ሰልፉ በአዲስ አበባ ጣልያን ኤምባሲ ፊለት ለፊት ለደቂቃዎች ቢካሔድም፣ የህወሓት አገዛዝ ከደቂቃዎች በኋላ ወታደር ልኮ ሰልፉን በትኖት ነበር፡፡ ሰልፉ ላይ የነበሩ ሰዎች ፕ/ር መስፍንን ጨምሮ ለእስር ተዳርገው እንደነበነር አይዘነጋም፡፡ ህወሓት የግራዚያኒ ሐውልት እንዲፈርስ የሚጠይቀውን የተቃውሞ ሰልፍ በፖሊስ እንዲበተን ማስደረጉ በወቅቱ አግራሞትን አጭሮ ነበር፡፡

 

BBN Daily News November 11, 2017

Click to comment

Leave a Reply

Your email address will not be published. Required fields are marked *

በብዛት የተነበቡ ጽሁፎች

To Top