News Feature

የኦሮሚያ እና ሶማሌ ክልል ግጭት ያደረሰው ጉዳት መጠነ ሰፊ መሆኑ ተገለጸ

በኢትዮጵያ ሶማሌ እና ኦሮሚያ ክልል የድንበር አዋሳኝ ቦታዎች ላይ የተከሰተው ግጭት መጠነ ሰፊ ጉዳት ማድረሱ ተገለጸ፡፡ የግጭቱን መንስኤ እና ያደረሰውን ጉዳት ለመመርመር በገዥው ፓርቲ ፓርላማ የተቋቋመው የሱፐርቪዥን ቡድን፤ የግጭቱ ሰለባ የሆኑ የሁለቱን ክልል ተፈናቃዮች በማነጋገር ያጠናቀረውን ሪፖርት ይፋ አድርጓል፡፡ በሪፖርቱ እንደተገለጸው ከሆነ፤ ግጭቱ አሳዛኝ እና የሚያስቆጭ ውጤት ያስከተለ ሲሆን፤ ግጭቱን ተከትሎ ከመኖሪያ ቀዬአቸው የተፈናቀሉ ዜጎችም ከባድ ጉዳት ደርሶባቸዋል፡፡

እስከ አስር ሺህ የሚገመት ሰው ባለቀበት በዚህ ግጭት፤ የሶማሌ ክልል ልዩ የፖሊስ ኃይል ከፍተኛ ጥቃት እንደፈጸመባቸው ከሶማሌ ክልል የተፈናቀሉ የኦሮሞ ተወላጆች ተናግረዋል፡፡ ተፈናቃዮቹ ‹‹ዘግኛኝ ጥቃት ተፈጽሞብናል!›› ብለው በጠሩት በዚህ ግጭት ውስጥ፤ ከሶማሌ ክልል ልዩ ኃይል በተጨማሪም የአካባቢው ፖሊስ እና ሚሊሻም ከፍተኛ ጥቃት እንደፈጸመባቸው ሪፖርቱን ለማጠናቀር ለተቋቋመው ቡድን ተናግረዋል፡፡ ከሰላማዊው የኢትዮጵያ ሶማሌ ክልል ህዝብ ጋር ጠብ እንደሌላቸው የገለጹት የኦሮሞ ተወላጅ ተፈናቃዮች፤ ጥቃት የፈጸሙባቸውን የጸጥታ አካላት በስም በመጥራት ጭምር በግጭቱ ውስጥ መሳተፋቸውን አጋልጠዋል፡፡
‹‹ኦሮሞ በመሆናችን ብቻ እየተለየን አሰቃቂ ግድያ ተፈጽሞብናል›› ሲሉ የገለጹት ተፈናቃዮቹ፤ በዚህ ጥቃትም ከህጻን እስከ አዋቂ ድረስ ብዙዎች ለሞት መዳረጋቸውንም ተናግረዋል፡፡ በሴቶች ላይ ለመናገር እንኳን የሚዘገንን የጾታ ጥቃት መፈጸሙን የተናገሩት እነዚሁ ተጎጂዎች፤ በአጠቃላይ በተወሰደው እርምጃ ብዙዎች ለአካል እና አዕምሮ ጉዳት መዳረጋቸውን የተፈናቃዮቹ ገለጻ ያስረዳል፡፡ የደረሰባቸውን የጉዳት መጠን መዘርዘራቸውን የቀጠሉት ተፈናቃዮቹ፤ ግጭቱ መከሰቱን ተከትሎ በሶማሌ ክልል ያፈሩትን ሀብት መዘረፋቸውንም ጠቅሰዋል፡፡ ከተዘረፉባቸው ሀብት እና ንብረቶች መካከልም መኪና፣ መኖሪያ ቤት፣ ጥሬ ገንዘብ፣ የንግድ ቤቶች እና ሌሎችም እንደሚገኙበት ተናግረዋል፡፡

ከሶማሌ ክልል ከተፈናቀሉ በመቶ ሺዎች ከሚቆጠሩ የኦሮሞ ተወላጆች መካከል ነጋዴዎች፣ የመንግስት ሰራተኞች እና በሌሎች ስራዎች ላይ ተሰማርተው የነበሩ ሰዎች ይገኙበታል፡፡ ግጭቱን ተከትሎ ቀውሱ በተፈጠረባቸው አካባቢዎች የተሰማራው መከላከያ ሠራዊት፣ ግጭቱን ለማብረድ ምንም ዓይነት እገዛ አለማድረጉን የገለጹት ተፈናቃዮቹ፤ በፌደራል መንግስቱ በኩልም ግጭቱን ለማብረድ ዳተኝነት መስተዋሉን አልሸሸጉም፡፡ የተለያዩ የመንግስት አመራሮች በመጠለያ ቦታዎች በመገኘት ተፈናቃዮችን መጎብኘታቸውን የገለጹት ተጎጂዎቹ፤ ሆኖም ምንም ሊፈይዱላቸው እንዳልቻሉ አክለው ገልጸዋል፡፡ ተፈናቃዮቹ አሁን እየተሰፈረላቸው በሚገኘው ቀለብ ኑሮን መግፋት አዳጋች እንደሆነባቸው እና እየተሰጣቸው የሚገኘው እርዳታም በቂ አለመሆኑን ገልጸዋል፡፡

ከኦሮሚያ ክልል ተፈናቅለው በተለያዩ የመጠለያ ካምፖች የሚገኙ የኢትዮጵያ ሶማሌ ክልል ተወላጆችም በተመሳሳይ ሁኔታ፤ ለረዥም ጊዜ አብረውት ከኖሩት የኦሮሞ ህዝብ ጋር ችግር እንደሌለባቸው ገልጸው፤ ከመኖሪያ ቀዬአቸው የተፈናቀሉት በተለያዩ የኦሮሚያ ክልል አስተዳደር ኃላፊዎች አማካይነት መሆኑን ተናግረዋል፡፡ እንዲሁም በኦሮሚያ ክልል ያፈሩት ሀብት እና ንብረታቸውን እንደተዘረፉ እና በሴቶች ላይ ጾታዊ ጥቃት እንደተፈጸመ የተናገሩት የኢትዮጵያ ሶማሌ ክልል ተወላጆች፤ በአሁን ሰዓት ችግር ላይ እንደሚገኙም ገልጸዋል፡፡ መንግስት ወደተፈናቀሉበት ቦታ እንዲመልሳቸው አልያም ከመጠለያ ካምፕ ወጥተው አዲስ ህይወት መጀመር እንደሚፈልጉ፣ ግጭቱን ለመመርመር ለተቋቋመው ቡድን ተናግረዋል፡፡ በአጠቃላይ ተፈናቃዮቹ ተጠልለው በሚገኙባቸው የተለያዩ ካምፖች የምግብ፣ የንጹህ መጠጥ ውሃ እና የጤና ችግር በሰፊው መኖሩን ተናግረዋል፡፡

BBN news January 8, 2018

Click to comment

Leave a Reply

Your email address will not be published. Required fields are marked *

በብዛት የተነበቡ ጽሁፎች

To Top