News Feature

ጀግናዋ አትሌት ገንዘቤ ዲባባ ወደ ውድድር ልትመለስ ነው


ቦጋለ አበበ

የዓለም የአንድ ሺ አምስት መቶ ሜትር ቻምፒዮኗ አትሌት ገንዘቤ ዲባባ ከረጅም ጊዜ በኋላ ወደ ውድድር እንደምትመለስ ታውቋል። የዓለም አቀፉ አትሌቲክስ ፌዴሬሽኖች ማህበር በድህረ ገፁ እንዳስንበበው ገንዘቤ በቀጣዩ የፈረንጆች ወር መጀመሪያ ወደ ውድድር ተመልሳ የቤት ውስጥ የዙር ውድድር መጀመሪያ በሆነው በጀርመን ካልሹር ተሳታፊ ትሆናለች።

ገንዘቤ እኤአ በ2014 በዚሁ ስፍራ ተወዳድራ የዓለም የቤት ውስጥ የአንድ ሺ አምስት መቶ ሜትር ክብረወሰንን ከሦስት ሰከንድ በበለጠ በማሻሻል 3:55፡17 የሆነ ሰዓት ማስመዝገቧ ይታወሳል። ይህንንም ሰዓት ከገንዘቤ ውጪ ዳግመኛ በሁለት ሰከንድ የተጠጋ ሌላ አትሌት የለም።

ባለፉት ሦስት ዓመታት በቤት ውስጥም ከቤት ውጪም ባሉ መካከለኛና ረጅም ርቀቶች በርካታ የዓለም ክብረወሰኖችን በቀናት ልዩነት ሳይቀር የግሏ ማድረግ የቻለችው ገንዘቤ፤ በ2017 የውድድር ዓመት መጀመሪያ የሁለት ሺ ሜትር የቤት ውስጥ የዓለም ክብረወሰንን ሳባዴል ላይ 5፡23፡75 በማስመዝገብ መስበሯ አይዘነጋም።

በአንድ ሺ አምስት መቶ ሜትር የቤት ውስጥ ውድድርም ዓመቱ የዓመቱን መሪ ሰዓት መያዝ ችላ ነበር። ይህም በአስራ ስድስተኛው የለንደኑ የዓለም አትሌቲክስ ቻምፒዮና በርካታ ኢትዮጵያ ውያን ውጤት እንዲጠብቁባት አድርጓል። ይሁን እንጂ ገንዘቤ በቻምፒዮናው ላይ የተጠበቀባትን ብቃት ማሳየት ተስኗት በአንድ ሺ አምስት መቶ ሜትር ከግማሽ ፍፃሜ የማጣሪያ ውድድር በላይ መጓዝ እንዳልቻለች ይታወሳል። ይህም በተለያዩ የማህበራዊ መገናኛ ብዙሃን ትችት እንዲደርስባት አድርጎ ነበር።

ከለንደኑ የዓለም ቻምፒዮና በኋላ ከውድድር ርቃ የቆየችው ገንዘቤ አሁን አድናቂዎቿንና የአትሌቲክሱን ቤተሰብ ለመካስ ለእሷ ምቹ ወደ ሆነውና ደጋግማ ወደምታሸንፍበት የቤት ውስጥ ውድድር ተመልሳለች። ይህም በመጪው የካቲት በበርሚንግሃም ሲቲ በሚካሄደው የዓለም የቤት ውስጥ አትሌቲክስ ቻምፒዮና ላይ ለመሳተፍ እንደ ዝግጅት ይጠቅማታል ተብሎ ይጠበቃል።
ገንዘቤ በመጀመሪያ ውድድሯ በመካከለኛ ርቀት ተስፋ ከተጣለባት የሃያ ዓመቷ ጀርመናዊት ኮንስታንዜ ክሎስተርሃልፈን ብረቱ ፉክክር ይገጠማታል ተብሎ ይጠበቃል። ባለፈው የውድድር ዓመት ድንቅ ብቃት ያሳየችው ይህች ወጣት ጀርመናዊት አትሌት ከቤት ውጪ ባሉ ውድድሮች በአንድ ሺ አምስት መቶና ሦስት ሺ ሜትሮች በቅደም ተከተል 3፡58፡92 እና 8፡29፡89 የሆነ የራሷን ምርጥ ሰዓት በማስመዝገብ አስደናቂ አቋም ማሳየት ችላለች። ባለፈው የአውሮፓ የቤት ውስጥ ቻምፒዮናም የብር ሜዳሊያ ማጥለቅ እንደቻለች ይታወሳል።

በአንድ ወር ውስጥ በስድስት የተለያዩ ከተሞች በሚካሄደው የዓለም የቤት ውስጥ የዙር ውድድር በሴቶች መካከል የሚደረገው ፉክክር እያንዳንዱ አትሌት በየውድድሩ የሚያስመዘግበው ነጥብ ተደምሮ አጠቃላይ አሸናፊው የሃያ ሺ ዶላር ተሸላሚ ይሆናል። ከዚህ በተጨማሪም አጠቃላይ አሸናፊ የምትሆነው አትሌት በበርሚንግሃም ሲቲው የዓለም የቤት ውስጥ ቻምፒዮና በቀጥታ ተሳታፊ የምትሆን ይሆናል።
ውድድሩ በፈረንጆቹ ቀጣይ ወር በሦስት ካልሹር ተጀምሮ ከሦስት ቀናት በኋላ እዚያው ጀርመን ዱሴልዶርፍ ሁለተኛ መዳረሻውን ያደርጋል። በሁለት ቀናት ልዩነትም በስፔን ማድሪድ፤ በአሜሪካ ቦስተንና በፖላንት ቶረን ሲካሄድ የመጨረሻው ውድድር በሃያ አምስት ግላስጎ ላይ የሚደመደም ይሆናል።

የ2015 የዓመቱ ኮከብ አትሌት ገንዘቤ ዲባባ ባለፉት ሁለት ዓመታት የተለያዩ የዓለም ክብረወሰኖችን የግሏ በማድረግ ያሳየችውን ድንቅ ብቃት ዘንድሮም በጥሩ ጤንነት ላይ ከተገኘች ልትደግመው እንደምትችል በርካቶች ያምናሉ። ባለፉት ሁለት ዓመታት በአማካኝ በአንድ ዓመት ሦስት የዓለም ክብረወሰኖችን በማሻሻል አድናቆት አትርፋለች።

ባለፉት ሁለት ዓመታት የቤት ውስጥ የዓለም ቻምፒዮናን የወርቅ ሜዳሊያ ከማሸነፍ በተጨማሪ በተለያዩ ርቀቶች በርካታ የቤት ውስጥ የዓለም ክብረወሰኖችን በእጇ ያስገባችው ገንዘቤ ፊቷን ከቤት ውጪ ወዳሉ ውድድሮች መልሳ የዓለም ቻምፒዮናን ክብርና የዓለም ክብረወሰንን ማሳካት ችላለች።

ለሁለት አስርት ዓመታት ያህል ተይዞ የቆየውን የአንድ ሺ አምስት መቶ ሜትር ክብረወሰን አስደናቂ በሆነ 3፡50፡07 ሰዓት መስበር የቻለችው ገንዘቤ ወር ባልሞላ ጊዜ ውስጥ በቤጂንግ የዓለም ቻምፒዮና በርቀቱ በአትሌቲክስ ህይወቷ የመጀመሪያና ልዩ የሆነውን የዓለም ቻምፒዮና የወርቅ ሜዳሊያ ማጥለቋ ይታወሳል። ይህ ተደጋጋሚ ስኬትም የዓመቱ ምርጥ ሴት አትሌት ሽልማት እንድትጎናፀፍ አስችሏታል።
ገንዘቤ ስቶክሆልም ላይ ሁለት የዓለም ክብረወሰ ኖችን ባለፉት ሁለት ዓመታት አስመዝግ ባለች። የአንድ ማይል ክብረወሰንም በገንዘቤ የመሰበር ዕድል እንዳለው ከወዲሁ እየወጡ ያሉ መረጃዎች ይጠቁማሉ። ገንዘቤ ይህን ክብረወሰን ካሳካች ስቶክሆልም ላይ ሦስት የቤት ውስጥ ክብረወሰኖችን በማሻሻል ከየትኛውም አትሌት የበለጠ ባለታሪክ ትሆናለች።

 

Click to comment

Leave a Reply

Your email address will not be published. Required fields are marked *

በብዛት የተነበቡ ጽሁፎች

To Top