“ጃ ያስተሰርያል!” አራት አመታት ተከልክሎ በነበረ መድረክ? – ክንፉ አስፋ

Filed under: ነፃ አስተያየቶች,ኪነ-ጥበባዊ ዜና |

            ቴዲ ወደ ባህርዳር ሲያቀና “እንዘምራለን”  ማለቱን ያስተውሏል!።  የጉዞውን አላማ እንዲያ ሲል ነበር ረቂቅ በሆነ መንገድ የገልጸው።  በመዘመር እና በመዝፈን መሃል ያለውን ጥልቅ ልዩነትየማይረዳ ብቻ ነው ለሰሞኑ “አሲዮ ቤሌማ” እጅ የሚሰጠው።  ከኮንሰርቱ ጀርባ ያለው “የፍቅር ጉዞ” የሚለው መሪ ቃል ውስጥም ከውቅያኖስ የጠለቀ መልዕክት አለ። ይህንን ቃል የተረዳ ብቻ ነውየተልእኮውን ስኬት ሊያበስር የሚችለው። ዝግጅቱ ኮንሰርት እንጂ ዳንኪራ አይደለም። ሁለት ወይንም ሶስት ሰዓት ብቻ የፈጀ ኮንሰርት። ጥላቻ ሳይሆን ፍቅር የነገሰበት ኮንሰርት።  ትንሳዔን አብሳሪ ኮንሰርት። መዝሙር ውስጥ መልዕክት አለ። የሚያንጽ፣ የሚያነቃቃ መልዕክት።

Inline image 1

መላው በጠፋበት በዚህ ወቅት፤  ኢትዮጵያ የምትሻው የተስፋ ቃል ብቻ የሚደሰኩርላትን ሳይሆን ድልድይ የሚዘርጋላትን ሰው ነው።  ጥላቻ ነግሷል። በሃገራችን ስር ሰድዶ፤ ቤተ እምነትን ሳይቀርአምሶታል፤  ጥላቻ – ጥላቻን ይወልዳል እንጂ ችግርን አይፈታም።  እሱን ለማንገስ ላለፉት 27 ዓመታት ብዙ ድንጋይ ተፈንቅሏል። አዎ ጥላቻ በሽታ መሆኑን አይተናል።

ይህን ክፉ በሽታ ለማርከስ  የፍቅርን ዳገት መውጣት ግድ ይላል። ጉዞውን ቴዲ ጀመረው። ጥላቻን የሚያከስሙ ዜማዎቹን የሰሙ …  እነ ለማ መገርሳ እነ … ዶክተር አብይ ተከተሉት።  ለማ መገርሳ”ኢትዮጵያዊነት ሱስ ነው” ማለቱ  የቴዲ “ሲንድረም” ስለመሆኑ የሚጠራጠር ይኖር ይሆን?

            ጎበዝ፣  ዘመኑንም እንቃኘው እንጂ!   ሰው ለታቦት ንግስ ወጥቶ በዚያው የሚቀርበት ዘመን እኮ ነው ያለነው። ወገን የእሬቻን በዓል ለማክበር ሄዶ እስከዘላለሙ የማይመለስበት ወቅት ላይ ነን።  ልቅሶና ሃዘንን ሰብሰብ ብሎ በጋራ የማይካፈሉባት ምድር፣  ምእመናን ለጸሎት ወጥተው የሚታፈኑበት ሃገር ላይ እንደተቀመጥን ለአፍታም አንዘንጋው።  ኮንስርት ማድረግ  ብርቅ የሆነበት ሃገር። ዳር ድንበርእንዲያስከብር የተላከ ወታደር  መሃል  ከተማ ገብቶ የወገን ደም የሚያፈስስበት ምድር!  በዚህች ያልታደለች ሃገር፣ በዚህ አስከፊ ዘመን፣   “ጃ ያስተሰርያል”ን  አጥንት ይዘን ስንጓተት አጃኢብ አይሆንም?

            ይህ እሰጥ እገባ  ልብ ላለው ሁሉ ቅንጦት ይሆናል።  ነገሩን በደንብ የተረዳው ወገን፣  ከ 50 ሺህ ሕዝብ  በላይ በታደመበት ዝግጅት ላይ  “ምን ይፈጠር ይሆን?”  እያለ የልቡ ትርታ ከፍ እና ዝቅይል ይሆናል እንጂ፣  ቀሪ ሂሳብ አያወራርድም።  ጥሩ ዜና በሚናፈቅበት በዚህ ቀውጢ ሰዓት፣  ሰማይ ላይ የወጣን የሕዝብ እምቅ ስሜት ተቆጣጥሮ በሰላም ማጠናቀቅ መቻል እጅግ የሚደነቅ ነገር  ነው።ስለዚህም ጉዳዩ የገባቸው ዝግጅቱ  “እንኳን በሰላም አለቀ!”  ይላሉ።  ሻንጣ በጀርባ ሸክፎ ማራቶንን መሮጥ ምን ያህል አስቸጋሪ እንደሆነ የሚያውቀው ሯጩ ብቻ ነው።

           እርግጥ ነው ሕዝብ ፍላጎቱን ገልጿል። የሕዝብ ጥያቄ ተገቢ ምላሽ ማግኘት ነበረበት።  የሕዝቡ ጫና ቀላል አልነበረም።  ይህንን በተመለከተ ከቴዲ አካባቢ የሚሰማው ነገር የህዝብ ስሜትንያለመረዳት ጉዳይ አይደለም።   ስሜትን መረዳት እና ስሜትን መንዳት ሁለት የተለያዩ ነገሮች ናቸው።   26ኛው የአሜሪካ ፕሬዚዳንት የነበሩት ቴዎዶር ሩዝቬልት በአንድ ወቅት ሲናገሩ “በመሪዎች እና በአለቃመካከል ያለውን ልዩነት ሰዎች ይጠይቃሉ።  መሪ ይመራል። አለቃ ደግሞ ይነዳል” ብለዋል።  መንዳት እጅግ ቀላል ነው። ውል ለማስያዝ መምራቱ ነው ከባድ።

        አራት አመታት ሙሉ ተከልክሎ የነበረ መድረክ፣  በሰላም እንዳያልቅ፣   እንከን የሚያሸትቱ ተንኳሾች  አሰፍስፈው የሚጠብቁት ነገር ነበር። የጌታቸው ማንጉዳይ ጣልቃ መግባት ነገሮችን አስቀድሞየመረዳት፣ አርቆ የማሰብ እና የመብሰል ውጤት ነው።  በዚህ ፍቅር ጉዞ እቅድ ላይ  “ጃ ያስተሰርያል” አልነበረም።  ጉዞው ለመዝፈን ሳይሆን መልዕክት ለማስተላለፍ ነው።  የሰላም እና የፍቅር መልዕክት።  በዚያ ውስጥ ሃዘን አለ። በዚያ ውስጥ ብሶት አለ። በዚያ ውስጥ ቁጭትም አለ።   በነገራችን ላይ በኮንሰርቱ ላይ ባለስልጣኖቹ በይገኙም ልጆቻቸው እና ሚስቶቻቸው በሙሉ ስቴዲየም ገብተው ከሕዝቡ ጋርሲደሰቱ ነበር።

ሕዝብ በአንዲት ቃል ብቻ ማነሳሳት እጅግ ቀላል ነው።  በረጅሙ የሚያይ ሳይሆን አጭሩን አላማ የመረጠ ይህንን ማድረግ ይቀልለዋል። ከዚህ ግፊት የሚገኘው ውጤት፣  ኪሳራ እንጂ ትርፉ ሚዛንሊደፋ አይችልም።  ጥይቱንም፣ ቀለሃውንም የያዙ ሃይሎች ሰፍ ብለው ይህችን ወቅት እንደሚጠብቁ አንዘንጋ።

እያወራን ያለነው ስለ ሞብ  ስነ-ልቦና ነው። ሞብ  የማህበረሰብ ስነ-ልቦና አካል ነው። የስነልቦና ምሁራን የሆኑት ጉስታቭ ሌቦን እና ሲግሞንድ ፍሬድ “ሰዎች አንድ አላማ ይዘው በሲሰባሰቡበሚጋሩት የጋራ የሆነ አመለካከት፣  ግላዊ ሃላፊነትን ከአናታቸው አርደው ስለሚጥሉ፣  ምንም ነገር ከማድረግ አይቆጠቡም ” ይሉናል።

            ይህን ያህል ግዙፍ ኮንሰርት ይቅርና ሰዎቹ የራሳቸው የመቀሌው ስብሰባም “በሰላም አለቀ” ይሉን የለ? በረጅሙ እየተነፈሱ “የአዲስ አበባው ጥምቀት በዓል በሰላም ተጠናቀቀ” ብለውናል።በተዘዋዋሪ ሰላም የምትለው ቃል  እንደ ዳይኖሰርስ  ከምድሪቱ ጠፍታለች እያሉን እኮ ነው። ሰዎቹ እኮ አስከሬን አጅቦ የሚሄድን ለቀስተኛ እንኳን ማመን የተሳናቸው፣ በራስ ገመድ ተጠልፈው፣  የራሳቸውንጥላ እንኳን የሚፈሩ፣…  ምጥ ውስጥ ያሉ ናቸው።  የፈሪ ዶላ ረጅም ነው እንዲሉ በጋራ ሆኖ ያዜመ ላይ ሳይቀር የሚተኩሱት  ለዚህም ነው።

            ትልቁን ጥበብ እና ማስተዋል የሚጠይቀው ሕዝብ በተሰበሰበበት ስፍራ ሊመጣ የሚችለውን ችግር ማስወገድ መቻል ነው።  ይህ አርቆ ማሰብን ይጠይቃል። ቅዝምዝም ሲወረወር ጎንበስ ብሎየሚያልፍ  አስተዋይ ብቻ ነው። የሕዝብን ስሜት ማረጋጋት መቻል ራሱን የቻለ ጥበብ ይጠይቃል። ብሶት ያጋለው ሕዝብ ነው። እልህ የተናነቀው ሕዝብ። በቋፍ ላይ ያለ ሕዝብ።   አንድ ነገር ለማድረግጥቂት ቃላት ብቻ ይበቃሉ።

ደግሞ ጨዋ ነው። መሪውን የሚሰማ – ለሚወድደው የሚታዘዝ ሕዝብ።

            ሁሉም ነገር ግዜውን ጠብቆ ይከሰታል። ከዚህ ቀደም ቴዲ “ጃ ያስተሰርያል”ን ለምን አልዘፈነም ብለን ጮኸናል። ለጩኸታችን ምክንያቱ አጥጋቢ ይሁንም-አይሁን፣  ወቅቱ ይህንን ለማለት ይፈቅድነበር። ከአመታት በፊት “ጃ ያስተሰርያል”  ሲዘፈን የነበረው ሁነታ አሁን የለም። አሁን  ስለ ለውጥ እና ስለ አዲስ ንጉስ መምጣት አይደለም የምንጨነቀው። የመኖር እና የአለመኖር፣ የለህልውና ጥያቄ ላይደርሰናል።  የንጹሃን ደም በየቀኑ ይፈስሳል።  ሃገር እንደጉድ ይዘረፋል። እየተካሄደ ያለውን ግፍ ቃላት አይገልፀዉም።  ነገሩን ከስሜት መነጽር ወጣ አድርገን እንመልከተው።  ፈጥኖ መፍረድ እና ፈጥኖ መናደድ ከአመክንዮ ሳይሆን ይልቁንም ከፍርሃት እና ከድንቁርና ጋር እጅ ለእጅ የሚሄድ ነገር ነው።

            አሁን ነገሮች ተለዋውጠዋል።  ወደድንም ጠላን፣   አገዛዙ ዳግማዊ “ዘመነ መሳፍንት”  ውስጥ አስምጦን፣  እልቂት አፉን ከፍቶ እየጠበቀን ይገኛል።  ሃገሪቱ አጼ «ቴዎድሮስ»ን  ትሻለች። የአይሻልንጦርነት በድል ተወጥቶ ዳግማዊው ዘመነ መሳፍንትን  ማብቂያ ያሚያውጅ ጀግና የማውጣቱን  ነገር  ግድ ይላል።

በቴዲ እና በአቡጊዳ ኢትዮጵያ የተጀመረው የፍቅር ጉዞ ይቀጥላል።  ቀጣይዋ  ከተማ ውቢቷ ናዝሬት / አዳማ ናት። በከተማዋ ቀደም ሲል የተዘራው የጥላቻ በሽታ በፍቅር ይታከማል። እነ ለማ መገርሳም በአዳማው ኮንሰርት ላይ ይገኙ ይሆናል።

ፍቅር ያሸንፋል!

2 Responses to “ጃ ያስተሰርያል!” አራት አመታት ተከልክሎ በነበረ መድረክ? – ክንፉ አስፋ

  1. ቴዲ አፍሮ የህዝቡን ትኩሳት በማየት የፈውሱን ቅመም መጥኖ በማቅረብ የኢትዮጵያ ህዝብ ልብ ውስጥ መግባት የቻለና በህዝብ የተወደደ አቀንቃኝ ነው። ያ ማለት ግን እነ አቶ ለማ መገርሳ እና አቶ አብይ የቴዲ አፍሮን ዘፈን ስለሰሙ ነው ተለውጠው ኢትዮጵያዊነትን ያቀነቀኑት ዓይነት ዲስኩር ግን ሚዛን አይደፋም ከትዝብትም አያድንም!!
    እና ጸሐፊው (ክንፉ አሰፋ)ማለት የፈለግከውን ማብራሪያ እንድትሰጥበት ትመከራለህ!!
    አለዚያ ግን በርካታ ጥያቄዎችን አንስተን “አጥብቀን” እንሞግትሃለን ስለዚህ ምን ማለት ፈልገህ እንደሆነ ማብራሪያ እንድትሰጥበት ትለመናለህ!!!

    Amanuel ze Ambo
    January 24, 2018 at 12:22 pm
    Reply

  2. Amde Tseyon
    22 ጥር በ 08:58 ከሰዓት ·

    ፍቅር ያሸንፋል አንዳንዴ! ጥፊ ያሸንፋል ብዙ ጊዜ!

    ቴዲ አፍሮ(አድናቂው ነኝ) “ፍቅር ያሸንፋል” ሲል እኔ የሚገባኝ ከጥላቻ ፍቅር ይሻላል ወይም በቅዱሱ መጽሃፍ እንደተጻፈው የሚጠሉኝን በመውደድ በእነርሱ ላይ የሞራል የበላይነትን እቀዳጃለሁ ማለቱ ነው ብዬ ነው። ስለዚህ የቴዲ “ፍቅር ያሸንፋል” መፈክር በመንፈሳዊው ዓለም ተቀባይነት ይኖረዋል። ከዚያ ውጭ እንዲሁ በጥቅሉ “ፍቅር ያሸንፋል” ማለት አሻሚ የሆነ አባባል ነው የሚሆነው። የክርስቶስ ፍቅር አይሁዶችን አላሸነፋቸውም። ዛሬም አያምኑትም። ፍቅር በተፈጥሮው የሰውን ፈቃድ የሚያስገድድ ስላልሆነ ሁልጊዜ ሊያሸንፍ አይችልም። እንደውም አብዛኛውን ጊዜ ዱላ ነው የሚያሸንፈው። ብዙ ጠማማ ስላለ። ናዚ ጀርመን በፍቅር አለተሸነፈም። ፋሽስት ጣልያን በፍቅር አልወደቀም። ታንክ፤ሮኬት፤መድፍ፡መትረየስ የተቀላቀለበት መቅሰፍት ነው ያሸነፋቸው። ያንተው ወያኔም በፍቅር አይንበረከክም። ቁጭ ብለህ ብትጠላውም የትም አይሄድም። መፍትሄው ዱላ ብቻ ነው ። እናም መንፈሳዊነታችን የቴዲ አፍሮ ደረጃ ላይ ያልደረሰ የገሃዱ ዓለም ተንቀሳቃሾች ፍቅር ያሸንፋል አንዳንዴ! ጥፊ ያሸንፋል ብዙ ጊዜ! እንላለን።

    Thomas
    January 24, 2018 at 10:27 pm
    Reply

Leave a Reply to Thomas Cancel reply

Your email address will not be published. Required fields are marked *