News Feature

የአወልያ ኮሌጅ አረብኛ ዲፖርትመንት ሴት ተማሪዎች የድረሱልን ጥሪ አቀረቡ

ተማሪዎቹ ክፍያ ካልከፈላችሁ ፈተና አትቀመጡም የሚል የእግድ መመሪያ ደርሷቸው ተጨናንቀዋል።

በተያያዘ መረጃም በኮሌጁ የህፃናት ማሳደጊያ ውስጥም ከመላው ኢትዬጲያ የተመለመሉ ህፃናቶች ከሰዎች ተገልለው በግቢው ውስጥ እየኖሩ የአህባሽ ስልጠና እየወሰዱ ይገኛሉ።

ከዛሬ 13 አመት በፊት የተጀመረውና በርካታ ሙስሊም ሴት ተማሪዎች ተምረውበት በአዲስ አበባ በሚገኙ ትምህርት ቤቶች ውስጥ በአረብኛ መምህርነት ተቀጥረው ራሳቸውን እንዲችሉ ከፍተኛ አስተዋፅኦ ያበረከተው የኮሌጁ አረብኛ ዲፖርትመንት ዛሬ ላይ አደጋ ተደቅኖበታል።

በፈረንጆቹ አቆጣጠር በ2004 የተጀመረው ይሄው የአረብኛ ዲፖርትመንት ዛሬ ላይ ሙስሊም ሴት ተማሪዎቹ የመመዝገቢያ 400 ብር ተጨማሪ የትምህርት ክፍያ ደግሞ 300 ብር ካልከፈላችሁ ፈተና አትቀመጡም ተብለው ተማሪዎቹ በከፍተኛ መረበሽና ጭንቀት ላይ ይገኛሉ።

መረጃውን ለቢቢኤን ያደረሱን ምንጮቻችን አክለው እንደተናገሩት ይህንን መመሪያ ያስተላለፈው በከፍተኛ የሙስና ወንጀልና በመጅሊስ ቢሮ ተቀጥረው የሚሰሩ ሴቶችን በመተናኮል የሚታወቀው አቶ አራጋው የተባለው ግለሰብ ሲሆን ይህ ግለሰብ በህገወጡ መጅሊስ አማካኝነት ወደ አወልያ ኮሌጅ ተመድቦ ከመጣ ጀምሮ በርካታ ፀረ ሙስሊም የሆኑ ተግባራትን እያከናወነ ይገኛል።

ይሄው አቶ አራጋው የተባለው ግለሰብ ባስተላለፈው በዚሁ መመሪያም አያይዞም እንደገለፀው ተማሪዎቹ ክፍያውን ካለፈው የመስከረም ወር ጀምሮ ታሳቢ አድርገው አጠቃለው እንዲከፍሉ አለበለዚያ ፈተና ላይ መቀመጥ እንደማይችሉ መመሪያ ማስተላለፉ ነው ተጨምሮ የታወቀ ሲሆን ሙስሊም ሴት ተማሪዎቹም የተጠየቅነውን ገንዘብ ለመክፈል አቅም ስለሌለን ህዝበ ሙስሊሙ ከጎናችን ቁሞ ድምፁን ያሰማልን ሲሉ ተማፅነዋል።

ይህ በእንዲህ እንዳለም በአወልያ ኮሌጅ የህፃናት ማሳደጊያ ግቢው ውስጥ ከመላው የኢትዬጲያ ክልል ተውጣጥተው የመጡ ህፃናቶች ከማንኛውም ሰው ተገልለው በግቢው ውስጥ በጥብቅ ጥበቃ ስር ሆነው የአህባሽ ስልጠና እየተሰጣቸው መሆኑ የታወቀ ሲሆን ተማሪዎቹ ሙሉ በሙሉ ከግቢው የማይወጡ ሲሆን ከፍተኛ በጀት ተመድቦላቸው አስፈላጊው ነገር ሁሉ እዚያው ግቢው ውስጥ እየተሟላላቸው እየተማሩ ይገኛሉ።

ኢንሻ አላህ ተጨማሪ የመረጃ ምንጮችን የድምፅ መረጃ በምሽቱ መደበኛ ፕሮግራማችን ላይ በዝርዝር ይዘን እንቀርባለን። (BBN)

Click to comment

Leave a Reply

Your email address will not be published. Required fields are marked *

በብዛት የተነበቡ ጽሁፎች

To Top