Sport: የ2018ቱ ዓለም ዋንጫ

Filed under: News Feature,ስፖርት |

ብርሃን ፈይሳ

የዓለም ዋንጫ እአአ ከ2006 በኋላ በአፍሪካ እና በደቡብ አሜሪካ የነበረውን ቆይታ አጠናቆ ወደ አውሮፓ ተመልሷል። ሊካሄድ ወራት ብቻ ለቀሩት ታላቁ ውድድርም ሩሲያ በ11ከተሞቿ የሚገኙትን 12 ስታዲየሞች ማዘጋጀቷን አስታውቃለች። 32ብሄራዊ ቡድኖች በሚያካሄዱት 64 ጨዋታዎች የመጀመሪያውም ሆነ ለፍጻሜ የሚደርሱት ቡድኖች መቀመጫውን ሞስኮ ባደረገውና 81ሺ ሰዎችን ማስተናገድ በሚችለው ግዙፉ ሉዢኒኪ ስታዲየም የሚጫወቱ ይሆናል።

በዓለም ዋንጫ፤ጨዋታዎች የሚካሄዱባቸው ኳሶች የራሳቸው ስያሜዎች እንዳሏቸው ይታወቃል። ጃቡላኒ እና ብራዙካ የሚሉት የኳስ ስሞችም በ2010 እና 2014ቱ ዓለም ዋንጫዎች የነበሩ የቅርብ ጊዜ ትዝታዎች ናቸው። በአዲዳስ አዘጋጅነት ይፋ የተደረገው የ2018ቱ ዓለም ዋንጫ ኳስም «ቴሌስታር 18» የሚል ስያሜ ተሰጥቶታል። ዲዛይኑም እአአ የ1970ውን የሜክሲኮ ዓለም ዋንጫ የኳስ ዲዛይን መሰረት አድርጎ የተሠራ መሆኑም ታውቋል።

ሩሲያ በምታስተናግደው በዚህ ዓለም ዋንጫ ላይ ተሳታፊ ለመሆን የሚካሄዱት የማጣሪያ ውድድሮች ባለፈው ሳምንት ሙሉ ለሙሉ ተጠናቀዋል። ወደ ሩሲያ የሚያስጉዛትን ቲኬት በመቁረጥ 32ኛዋ ሃገር የሆነችው ፔሩ ስትሆን፤ የዓለም ዋንጫው የምድብ ድልድልም በመጪው የፈረንጆቹ ወር የመጀመሪያ ዕለት በሞስኮ እንደሚካሄድ ይጠበቃል። ናይጄሪያ፣ ግብጽ፣ ሴኔጋል፣ ሞሮኮ እንዲሁም ቱኒዚያም ደግሞ አፍሪካን ወክለው በዓለም ዋንጫው ተሳታፊ የሚሆኑ ሃገራት ናቸው።

በዓለም ዋንጫው ያለፉ ሃገራት በደስታ ጮቤ ሲረግጡ፤ ከተሳታፊነት ውጪ የሆኑት ደግሞ የዓለም ዋንጫው ተመልካችነታቸውን አረጋግጠዋል። ብራዚልና ጀርመን ተሳትፏቸውን ያረጋገጡ ቀዳሚዎቹ ሃገራት ሲሆኑ፤ የጣሊያን ብሄራዊ ቡድን ከተሳትፎ ውጪ መሆን ደግሞ አስደንጋጭና ያልተጠበቀ ጉዳይ ሆኗል። በእግር ኳስ ስፖርት የተሻለ ስም ካላቸውና ዋንጫውንም ማንሳት እንደሚችሉ ከሚጠበቁት ሃገራት አንዷ ጣሊያን ናት። ይሁን እንጂ እኤአ ከ1958 ወዲህ በማጣሪያው ሳይሳካላት በመቅረቱ በሩሲያ ከማይታዩ ብሄራዊ ቡድኖች አንዷ ሆናለች።

በዓለም በተወዳጅነቱ ቁጥር አንድ ሊባል በሚችለው በዚህ ውድድር ላይ ቡድኖች ለብሰው የሚጫወቱባቸውን ማሊያዎችም ይፋ በማድረግ ላይ ይገኛሉ። አዲዳስና ናይኪን የመሳሰሉ የዓለም ትልልቅ የስፖርት ቁሳቁስ አምራቾችም በዚህ ላይ ተሳታፊዎች ናቸው። አዲዳስ ስምንት የሚሆኑ ብሄራዊ ቡድኖችን መለያ ማዘጋጀቱን ያሳወቀ ሲሆን፤ ለእይታ ያቀረባቸው ማሊያዎች ከሃገራቱ ታሪክና ማንነት ጋር በተገናዘበ መልኩ ያዘጋጀው መሆኑንም አስታውቋል። ጀርመን፣ ስፔን፣ ሩሲያ፣ አርጀንቲና፣ ቤልጂየም፣ ኮሎምቢያ፣ ጃፓን እና ሜክሲኮ በአዲዳስ የተሠራውን መለያቸውን ይፋ አድርገዋል።

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.