ግብጽ ህዝቧን በሙሉ የመብራት ተጠቃሚ አድርጋ የኢትዮጵያ ህዝብ ያለመብራት እየኖረ የግድቡን ፕሮጀክት መቃወሟ ኢ-ፍትሀዊ ነው

1 min read

ግብጽ ህዝቧን በሙሉ የመብራት ተጠቃሚ አድርጋ ከ60 ሚሊዮን በላይ የሚሆነው የኢትዮጵያ ህዝብ ያለመብራት እየኖረ የግድቡን ፕሮጀክት መቃወሟ ኢ-ፍትሀዊ ነው ሲል የአልጀዚራው ተንታኝ ተናገረ

የግብጽ ህዝብ ሙሉ ለሙሉ የመብራት ተጠቃሚ ሆኖ ከ60 ሚሊዮን በላይ የሚሆነው የኢትዮጰያ ህዝብ ያለመብራት እየኖረ በአባይ ወንዝ ላይ የሚካሄድን ፕሮጀክት መቃወም ኢ-ፍትሀዊ ስለሆነ ያንን ለዓለም ህዝብ ማስረዳትና ድብቁን አጀንዳ ማጋለጥ የሁሉም ሃላፊነት እንደሆነ መሀመድ አልአሩሲ ተናገረ።

የአልጀዚራ አረብኛ ተንታኝ ጋዜጠኛ እና በህዳሴው ግድብ ዙሪያ በሚሰራጩ ዘገባዎች ላይ የኢትዮጵያን አቋም በመያዝ እውነታውን ለአረቡ ዓለም ለማስታወቅ በስፋት የሚሰራው መሀመድ አልአሩሲ ከኢትዮጵያ ፕሬስ ድርጅት ጋር ባደረገው ቃለ መጠይቅ እንደተናገረው፤ የታላቁ የኢትዮጵያ ህዳሴ ግድብ ፕሮጀክት የተፋሰሱን የታችኛው አገራት የማይጎዳ ፕሮጀክት መሆኑ ይታወቃል፤ ነገር ግን ግብጾች ይሄንን እውነታ በመካድ የሚያካሂዱትን ዘመቻ መመከት የሁሉም ኢትዮጵያዊ ሃላፊነት ሊሆን ይገባዋል።

ከ60 ሚሊየን በላይ የኢትዮጵያ ህዝብ ዛሬም ድረስ ያለመብራት ይኖራል ያለው ጋዜጠኛ መሀመድ፤ በተቃራው ግብፅ ውስጥ ሁሉም ሰው ያማረ ኑሮ ከመብራት ጋር ይኖራል፤ ይህንን እውነታ መቀየር ደግሞ ከሁላችንም የሚጠበቅ ተግባርና ኃላፊነት ነው ሲል ተናግሯል፡፡

“ግብፅ እያራመደች ያለውን ሃሳብ በሚገባ ተረድቶ ተገቢውን ምላሽ መስጠት፣ ሁሉም ሚዲያ ከመንግስት ጎን በመሆን በአንድ ልብ መስራት ያሰፈልገናል፡፡ የኢትዮጵያ ሚዲያዎችም እንደ ግብፅ ሚዲያዎች ስለአባይ በደንብ መዘገብ ይኖርባቸዋል፡፡ በህዳሴው ግድብ ዙሪያ ሁላችንም በአንድ ልብና በአንድነት እጅ ለእጅ ተያይዘን መስራት ይጠበቅብናል” ብሏል፡፡

በኢትዮጵያ ፕሬስ ድርጅት በምትታተመው የዓልአለም ጋዜጣ ላይ የተለያዩ ጽሁፎችን በመጻፍ ለዓረቡ ዓለም እውነታውን ለማስረዳት ጥረት እያደረገ ያለው ጋዜጠኛ መሀመድ፤ እነዚህ ጽሁፎቹና በቴሌቪዥን የሚሰጣቸው ትንታኔዎች የዓረቡ ዓለም ቀደም ብሎ በግብጽ ሚዲያዎች የተዛባ ዘገባ ይዞት የነበረውን እውነታ ቀስ በቀስ ማስቀየር እንዳስቻሉ ነው የተናገረው።

በዚህ ጥረቱ የተደሰቱት የኢፌዲሪ ጠቅላይ ሚኒስትር ዶ/ር አብይ አህመድ ለመሃመድ አልአሩሲ ስልክ በመደወል እንዳመሰገኑትና እንዳበረታቱት አስታውቋል።

በታላቁ ህዳሴ ግድብና በአባይ ወንዝ ጉዳይ በሚከናወኑ ተግባራት ዙሪያ ከዶ/ር አብይ አህመድ ጋር በስልክ በስፋት መነጋገሩን የገለጸው መሃመድ፤ ጠቅላይ ሚኒስትሩ “ኢትዮጵያ እንዳንተ ያሉ ሀገራቸውን የሚወዱ ሰዎች ያሰፈልጋታል” ሲሉ እንደማሰገኑት ገልጿል።

በአባይ ዙሪያ የሚሰራቸውን ስራዎች እየተከታተሉ መሆናቸውንና ሊበረታታ የሚገባው እንደሆነ እነደገለጹለት የተናገረው ጋዜጠኛ መሀመድ፤ “ኢትዮጵያን በዓለም መድረክ ከፍ ማድረግ እንፈልጋለን፣ በዚህ ሂደት ያንተ ተግባር ትልቅ እገዛ ስላለው በርታ” ማለታቸውንም ለኢትዮጵያ ፕሬስ ድርጅት ገልጻል።

“ውልዴቴና እድገቴ በውጭው ዓለም ቢሆንም ኢትዮጵያ በምዕራቡ ዓለም መልካም ገፅታ አልነበራትም፡፡ ከዚህ ቀደም አብዛኛው የአረብ ሀገራት ሚዲያዎች ኢትዮጵያ ደሃ እንደሆነች ነው ሲዘግብ የኖሩት፡፡ ይህ ተግባራቸው ደግሞ ትክክል እንዳልሆነ በደንብ እውነታውን ማስረዳት ችያለሁ፤ በቀጣይም ይሄን ማድረግ ያስፈልጋል” ነው ያለ መሀመድ።

“በመጣው ለውጥና ባገኘሁት እድል ተጠቅሜ ስለኢትዮጵያ፣ ስለህዳሴው ግድብና ስለአባይ ወንዝ ያለውን እውነታ በተገቢው መንገድ ለአረቡ ሚዲያ ማሳየት ስለፈለኩ ነው ወደዚህ ተግባር የገባሁት” ያለው ጋዜጠኛው፤ በቀጣይም አቅሙ በፈቀደውና በቻለው መጠን ሁሉ ስለህዳሴው ግድብ ያለውን እውነታ አጉልቶ ለማሳየትና ለማሳረዳት ጠንክሮ እነደሚሰራ ቃል ገብቷል።

ጋዜጠኛ መሀመድ አልሩሲ ከወር በፊት በኢትዮጵያ ፕሬስ ድርጅት አማካኝነት በኢትዮጵያ ለመጀመሪያ ጊዜ በተዘጋጀው የአረብኛ ተንታኞችና ጋዜጠኞች መድረክ ላይ መሳተፉና ሃሳቡን ማንጸባረቁ ይታወሳል፤ https://www.press.et/Ama/?p=29556

በተጨማሪም ጋዜጠኛው በድርጅቱ ስር በምትታተመው የዓልአለም ጋዜጣ ላይ አርቲክሎችን ይጽፋል።

በወንድማገኝ አሸብር

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.