የከርሞ ሰው በለን (ዘ-ጌርሣም)

1 min read

በትንሿ ዕድሚያችን መቶ በማትሞላው
ስንቱን ውጣ ውረድ እንግልት አየነው
ስንወድቅ ስንነሣ
ስንጠቁር ስንከሣ
መኖር ደጉ ነገር ራስን ያሳያል
ገመናን ሳይሸሽግ ለታሪክ ያቀርባል
አሮጌ ዓመት አልቆ በአዲሱ ሲተካ
የትናንቱ ዛሬ ሲቀርብ ለትረካ
የባሰ እንዳይመጣ ተመስገን በማለት
መቀበል ይገባል ሲጠባ አዲስ ዓመት
ልንል ይገባናል የከርሞ ሰው በለን
የምንጠብቀው ቁምነገር ስላለን
የትናንቱ ጅምር ለነገው ስንቅ ነው
የከርሞ ሰው በለን ብለን ከለመነው
ከዛሬ ለይ ቁሞ ትናንት ሲታወስ
ያ ሁሉ መከራ ወድቆ መንከላወስ
ተመስገን ያሰኛል አታምጣ የከፋ
ለልጅ ልጅ እንዳይደርስ አንገት የሚያስደፋ
የትናንቱን ስቃይ ስንቋጥር ስንፈታ
ለነገው አብሮነት ይገባል ይቅርታ
በዕድሜ አትቸኩብን አኑረህ አሳየን
ታሪክ ለመናገር ለመመስከር አብቃን
ኑሮ ባይመችም ከመሞት ይሻላል
ለሚመጣው ትውልድ እርሾ ያቀብላል
ቢከፋም ቢደላም ታሪክ ቅብብል ነው
ቀን ጎደለ ተብሎ ካልደረቀ ተስፋው
ልንል ይገባናል የከርሞ ሰው በለን
የምንጠብቀው ቁም ነገር ስላለን
ዛሬ ስንገንባ ነገን በማሰብ ነው
ለተተኪ ትውልድ እንዳይጎረብጠው
የትውልድ ውዴታ
የትውልድ ግዴታ
የታሪክ አውንታ
ተረካቢ ኑሮ ማሻገር ሲቻል ነው
ዘመን ተሻጋሪ ሕያው የሚሆነው
ልንል ይገባናል የከርሞ ሰው በለን
የምንጠብቀው ቁም ነገር ስላለን

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.