የኢትዮጵያና አሜሪካ የኢኮኖሚ አጋርነት ፎረም በዋሽንግተን ዲሲ እየተካሄደ ነው

Filed under: የዕለቱ ዜናዎች |

አዲስ አበባ፣ ግንቦት 8፣ 2011 (ኤፍ.ቢ.ሲ)የኢትዮጵያና አሜሪካ የኢኮኖሚ አጋርነት ፎረም በአሜሪካ ዋሽንግተን ዲሲ ከተማ በማካሄድ ላይ ይገኛል።

የአሜሪካ የውጭ ጉዳይ ሚኒስቴር አዘጋጅነት እየተካሄደ ያለው ፎረም ለሁለት ቀናት የሚቆይ ሲሆን፥ በፎረሙ ላይም በኢትዮጵያ ስላሉ የኢንቨስትመንት አማራጮች ዙሪያ ገለፃ ይደረጋል።

በፎረሙ ላይ በአሜሪካ የውጭ ጉዳይ ሚኒስቴር ቢሮ የአፍሪካ ጉዳዮች ረዳት ተጠሪ ሚኒስትር ቲቦር ናሽ፣ በአሜሪካ የኢትዮጵያ ባለሙሉ ስልጣን አምባሳደር ፍፁም አረጋ እና ዶክተር አርከበ እቁባይን ጨምሮ የተለያዩ የአሜሪካ እና የኢትዮጵያ የቢዝነስ መሪዎች፣ ተፅዕኖ ፈጣሪ ባለሃብቶች፣ ኢንቨስተሮች እንዲሁም የተለያዩ የንግድ ሰዎች እየተሳተፉ ነው።

በአሜሪካ የኢትዮጵያ ባለሙሉ ስልጣን አምባሳደር ፍፁም አረጋ እና ዶክተር አርከበ እቁባይ በኢትዮጵያ እየተካሄደ ባሉ የፖለቲካ እና የኢኮኖሚ የለውጥ ስራዎች ዙሪያ ለፎረሙ ተሳታፊዎች ገለጻ አድርገዋል።

አምባሳደር ፍጹም አረጋ እንዳስታወቁት፥ በአሜሪካ የውጭ ጉዳይ መስሪያ ቤት እየተካሄደ ባለው ጉባኤ በኢትዮጵያ የኢንቨስትመንት እድሎች፣ እየተወሰዱ ስላሉ የፖለቲካና የኢኮኖሚ ማሻሻያዎችና ሌሎች አንኳር ጉዳዮች ዙሪያ ጠቃሚ ምክክር ተደርጓል።

ለሁለት ቀናት በሚካሄደው ፎረም በቀጣይ፥ በፋይናንስ አቅርቦት፣ በመሰረተ ልማት ግንባታ፣ በቴሌ ኮሙዩኒኬሽን፣ በሀይል አቅርቦትና የማጓጓዣ ዘርፍ እና ግብርና ለፈጣን የኢኮኖሚ እድገት በሚኖራቸው ሚና ዙሪያ ውይይት እንደሚካሄድ ይጠበቃል።

የኢትዮጵያና አሜሪካ የኢኮኖሚ አጋርነት ፎረም በአሜሪካና በኢትዮጵያ መካከል ያለውን የኢኮኖሚ ግንኙነት ለማሳደግ በማለም ነው የተዘጋጀው።

ከዚህ ባለፈም ለአሜሪካ ባለሃብቶችና የቢዝነስ ሰዎች በኢትዮጵያ ያሉትን የተለያዩ የቢዝነስ ዕድሎችን በማሳወቅ መዋዕለ ነዋያቸውን እንዲያፈሱ የሚያስችል ነው ተብሏል።

ይህም በሀገራቱ መካከል ያለውን የንግድ፣ የቢዝነስና የኢንቨስትመንት ግንኙነት ወደ ላቀ ደረጃ ለማሳደግ የሚያስችል መሆኑ ነው ተገልጿል።

በተጨማሪም በኢትዮጵያ በአሁኑ ወቅት እየተካሄደ ያለውን የኢኮኖሚና የንግድና ሁለንተናዊ ለውጥ ለማበረታታት የሚያስችልም ነው ተብሏል።EBC

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.