ሰሞኑን በተከሰቱ የባህርዳርና አዲስ አበባ ቀውሶች ተሸንፈን  አገራችንን አንድነት በሚፈትን ቀውስ ውስጥ እንዳንገባ ሰከን ባለ መንፈስ  እናት ኢትዬጵያን በጋራ እንታደግ!!

Filed under: ነፃ አስተያየቶች |

አበባየሁ አሉላ

በባሕርዳርና አዲስ አበባ በሰሞኑ የተከሰተው ቀውስ በሁሉም አቅጣጫ የብዙ ወገኖቻችንን ሕይወት የቀጠፈ በመሆኑ በግራም ይሁን በቀኝ የዜጎቻችን ልብ የተሰበረበት ወቅት ነው!

በዚህ እንቆቅልሹ ባልተፈታ ቀውስ የአማራው ክልል ወገኖቻችንም ብርቅዬ ልጆቹን ያጣበት ወቅት በመሆኑ ሐዘኑና ምሬቱ እጅግ ከፍተኛ ነው!

በጠቅላይ ሚኒስትር አብይ አሕመድ አመራርና አስተዳደር ትላንት ኢትዬጵያ በሕወኃት/ኢህአደግ አመራር ውስጥ ከነበረችበት ዜጎኝ በሁሉም ማዕዘናት በእናት አገራቸው ባይተዋር ሆነው ነፃነትን ተነፍገው ብዙዎችም በአስከፊ ሁኔታ የእስር ሰላባ የነበሩበትንና ዘግናኝ ሰቆቃም በዜጎቻችን ላይ የተፈፀመበት የጨለማ ዘመን በአጭር ጊዜያት ለመለወጥ የተወሰደው እርምጃ በሕዝባችን ልብ ከፍተኛ ተስፋን መሰነቁ እሙን ነው!

በተመሳሳይም በሁለት የዕምነት ተቋሞቻችንና በምዕመናኖቻቸው ላይ የደረሰውን በደልና መከፋፈል ለመለወጥ ማመን በሚያስቸግር ፍጥነት በአጭር ግዜያት የተወሰደው እርምጃ አስደማሚ ሲሆን በተመሳሳይም እናት ኢትዬጵያ ጠበቃ አጥታ በቆየችበት 27 ዓመት የመከራ ዘመን በልጆቿ እምቢተኝነትና የለውጥ ኃይሉ መዘውሮችና በዋነኝነትም ጠቅላይ ሚኒስትር አቢይ ኢትዬጵያንና ኢትዬጵያዊነትን ከወደቀበት አንሥተው ከፍ በማድረግ ነፍስ መዝራታቸው በደስታና በተስፋ የአብዛኞቻችንን ልብ በእጅጉ ሞልቶታል!

በተከታታይ በተወሰድ አበራታች እርምጃዎች በተስፋም ተሞልተን ነገ ከዛሬ በይበልጥ የተሻለ ይሆናል ብለን እንድናልም አስችሎን ነበር!!

በመሆኑም የኢትዬጵያ ሕዝብ በአገር ቤትም ይሁን  ይሁን በውጭ አገራት ታይቶ በማይታወቅ መልኩ ለዚህ ሁሉ ፋይዳ ባለቤት ለሆኑት ለጠቅላይ ሚኒስቴር አብይ አሕመድና ጓዶቻቸው የሰጠው ልባዊ የአደባባይ ድጋፍ እጅግ ከፍተኛና የማይዘነጋ  ነው!

ይህም የሕዝብ ድጋፍ ጠቅላይ ሚኒስትሩ የሚወሰዷቸው ቀጣይ እርምጃች ከጥገናዊ ለውጥ ተሻግሮ ሁለንተናዊ ዲሞክራሲያዊት አገር እውን ለማድረግ ወደሚያስችል ምዕራፍ ለማሸጋገር አቅምና ብርታት እንደሚሰጣቸው ይታመናል።

ይህም በመሆኑም ሕዝብ በደረሰበት ፈተናና ምሬት የፍርኃት ቆፈኑን ሰብሮ በነቂስም አደባባይ ወጥቶ እንክ እንትፍ ያሉዋቸው የሕወኃት ድርጅትና ዋነኛ መሪ ተዋናዬች እንደ ጉም አቅም ከድቷቸውና ተስፋም ቆርጠው ግንቦት ሃያንም ሽክፈው መቀሌ እንዲከቱ አስገድዷቸዋል፤

በዚህ ሁሉ የህዝባችን ብሩህ ተስፋ ውስጥ ይህንን ሂደት በእንጭጬ ለማስቀረት ጥቅሙና ዓላማው የተሰናከለበት ሕወኃትና በጥቅሉም የኢህአደግ ቅሪቶች ብዙ መፍጨርጨራቸውና ፈተናም መደቀናቸው አልቀረም፣ በዚህ አጭር ጊዜ ሂደት ውስጥ ለ 27 ዓመታት የተዘራው ዘርንና ጎሣን የተከተለው መርህ ያስከተላቸው የማንነት ጥያቄዎች ፣ ወደ አገር ውስጥ ከተመለሱ ስብስቦች መካከል በጎሰኝነት የሰከሩና አጋጣሚውን በመጠቀም ዓላማቸውን በሕዝብ ውስጥ ሆነው ለማሳካት የሚሰሩና በኢትዬጵያ ጥላቻ መለያየትን በሚሰብኩ ፅንፈኛ ግለሰቦችና አመለካከቶች መወጠር የኢትዬጵያን ብሔራዊ ህልውና መሠረቱን የማናጋታቸው አደጋ የደቀነው ስጋት እጅግ የከፋ ነው፤ እንደዚሁም በብሔረተኝነት የተቃኙት ክልል መንግሥታት ማየልና የፌዴራሉን አቅም መፈታተናቸው፣ ይህንንም ለመመከት ፌዴራል መንግሥቱ ዳተኛ መሆኑ የዜጎችን የዕለት ተዕለት ሰላምና ደሕንነት የማስጠበቅና መሠረታዊ ሕግን በአግባቡ አለማስከበር በመላ አገሪቱ ሥርዓተ አልበኝነት በመስፈኑ በዚህ ሳቢያ የእርስ በርስ ጥቃቶች የብዙ ንፁኃን ዜጎችን ክቡር ሕይወት ቀጥፏል ፣ በሚሊዬኖች የሚገመቱ ዜጎች ከሚኖሩባቸው ቀዬዎች በግፍ  ተፈናቅለዋል ንብረታቸውንም አጥተዋል ይህም ሆኖ የተፈናቀሉትን መልሶ የሚያቋቁምና የሚጠልል መንግሥት አለማግኘታቸው በጠቅላይ ሚኒስትር አቢይ አስተዳደር ላይ እምነትን አሳጥቷል፤

አንድ መንግሥት እንደመንግሥት ሊወጣ የሚችላቸው መሠረታዊ እርምጃዎችና ተግባራት አለሟሟላት ሕዝባችን በጠበቀው የተስፋ ጭላንጭል ላይ ጭጋግ መሸፈኑ ዛሬ እመሬት ላይ የሚታይ ዕውነታ መሆኑን ሁላችንም እንገነዘባለን፤

ወደ ሰሞነኛው የባሕር ዳርና አዲስ አበባ ቀውስ ስንመለስ ክስተቱ ለሁሉም እንቆቅልሽ የመሆኑን ያክል ቀውሱን ተከትሎ ተያያዥነት የሌላቸው ሰላማዊ ዜጎች ፣ የፓለቲካ ድርጅትና የማሕበረሰብ ተቋማት አመራሮችና አባላት እንደትላንትናው በጅምላ መታሠራቸው በይበልጡኑ ተከስቶ የነበሩት ቀውሶች ሆን ተብለው የተወሰኑን ወገኖችን ለማጥቃትና ሰላማዊ ትግላቸውን ለማጨናገፍ በአገዛዙ የታቀድ ያክል ጥርጣሬ ፣ ያለመተማማመና ውዥንብር በሕዝባችን ህሊና እንዲያቃጭል አድርጓል፤

አገዛዙ ግልፅነትን ለማስፈን የክስተቱን መነሾና መንስዔ በገለልተኛ ወገን አጣርቶ ለሕዝብ ይፋ ማድረግ ሲገባው ክስተቱን አግነውት የመንግት ግልበጣ ነው በሚል ሕዝብን ከማማለል ይልቅ ነገም ይኽው ዓይነት ቀውስ በሌሎች አካባቢዎች እንዳይደገም መንስዔውን ከስረ መሰረቱ ማወቅና ማከም ሲገባ ማን አደረገው ማንስ አለበት በሚል ማዘናጋት እየተኬደ ያለበት መንገድ ቀውሱን በቀውስ ለማስቀጠል አደጋን የሚጋርጥ በመሆኑ የጠቅላይ ሚኒስትር አብይ አስተዳደር ሁኔታዎችን በማረጋጋት መነሻውን ማረቅና መለየት በዚህም ይህ ጥያቄ ምላሽ አጥቶ ለደዌው መድኃኒት ሳይገኝለት በተመሳሳይ በባሰ ቀውስ ውስጥ እንዳይገባ ጥንቃቄ ማድረግ እጅግ ይጠበቅበታል! ስለሆነም ማህበረሰቡን ክፍሎች በማሳተፍ በገለልተኝነት የተድበሰበሰውን ዕውነት ገልጦ መፍትሔ ሊያስቀምጥና ከስህተቱም በመማር ወደ ፊት በመጓዝ አገራችን አደገኛውን ግዜ እንድትሻገረው ሕዝብ የጣለበትን እምነትና ታሪካዊ አደራውን በግልፅነትና በጥንቃቄ ሊወጣ ይገባል፤

በዚህ ረገድ በብዙ ምሁራንና ጠበብቶች በተደጋጋሚ እንደተገለፀው አገሪቱ የምትመራበትንና የምትጓዝበት ፍኖተ ካርታ በግልፅ ባለመቀመጡ ለአስተዳደሩ መርኃግብርም አፈፃፀም ይሁን  የኢትዬጵያ ህዝብ ነገን በግልፅ አሻግሮ ማሳየት አልተቻለም! ይህንንም  ከግምት በማስገባት ከባለ ድርሻ አካላት ጋር በመምከር ለሁሉም ግልፅ ሊሆን የሚችል ፍኖተ ካርታ ( Road Map ) ማስቀመጥ የግድ ይላል።

በመንግሥታዊ ከፍተኛ የሥልጣን እርከኖች የሚሰጡ ሹመቶች ህዝብ ከዚህ በፊት ያለፈባቸውን ስጋቶቹን በማያጭር መልኩ ግልፅነትና ተጠያቂነት ባገናዘበና ወደ አንድ ወገን ባላዘመመ ብቃትን፣ የአገርና የህዝብ ታማኝነትን ብቻ አካታች በማድረግ የህዝብን ስሜት በማጤን ግልፅና ታአማኒነት የተሞላበት ድልድል ማድረግ የግድ ይላል፤ በታሪክ አጋጣሚ ይህችን አገር ህልውና የማስቀጠልና አንድነቷን አስጠብቆ እውነተኛ ፍትህና ዲሞክራሲ ወደ ሰፈነባት ምዕራፍ መውሰድ በዋነኝነት በዕርስዎ እጅ የወደቀ ነው! ይህ ተግባር ውስብስብ ችግሮችን መሻገር የሚጠይቅ በመሆኑ ከቃላትም በዘለለ ከድርጅት ታማኝነት ይልቅ ለሕዝብና ለአገር ታማኝ በመሆን ሕዝብንም ብቸኛ ጉልበትዎ በማድረግ በማይናወጥ አቅዋም በዙሪያዎ ያሉትን መሳሰሳቦች በመበጣጠስ ወገን በሙሉ ልብ የጣለብዎትን አደራ በመወጣት ኢትዬጵያን በማይናወጥ መሠረት ላይ በማኖር ለእውነተኛው የህዝብ ባለተራ የማሻገር ታሪካዊ ኃላፊነት በእጅዎ ነው።

በምሥራቅ ፣ በምዕራብ ፣ በሰሜንና ደቡብ የሚገኘው ኢትዬጵያዊ ማህበረሰባችንም ቢሆን የውጭም ይሁን የውስጥ ጠላቶቻችን ይህች ምትክ የሌላት እናት አገራችን አለቀላት አበቃላት እያሉ ሲያሟርቱ በሕዝቦቿ አንድነትና በፈጣሪያችን ጥበብ እንደገና ለማበብ በተዘጋጀችበት ወቅት ፈተናዎችን በመሻገር እርስ በርስ ከሚያጠላልፉንና ጥላቻን ከሚያብሱ ተግባራት በመቆጠብና አደብ በመግዛት ይህችን አገር የማፅናት ታሪካዊ ኃላፊነት ከጥንት አባቶቻችን በእኛው በዛሬዎቹ እጅ በመውደቁ ይህ ትውልድ ከማንነት ጥያቄ በዘለለ ለአንዲት እናት አገር ዘብ መቆም ከምን ጊዜውም በላይ በቅድሚያ ይጠበቅብናል፤

በየፊናችን አሉን የምንላቸው የክልልም ይሁን የማንነት ጥያቄዎቻችንን አገር ስትፀናና በትግላችን ፍታዊትና ዲሞክራዊት ኢትዬጵያን በመገንባት በዲሞክራሲያዊ አግባብ ፍላጎቶቻችንን በየደረጃው ለመፍታት ጊዜና ዕድል መስጠት ይጠበቅብናል!

ይህንን ባለማድረግ ከዛሬ ነገ ችግሮቻችን በማወሳሰብ ወደ ሁሉ አቀፍ ቀውስ ውስጥ እንድንገባና እንድንበተን ለሚተጉት እድል ብንሰጥ ምን ጊዜ የዛሬው ትውልድ ፀፀት ውስጥ በሚከት የታሪክ ተወቃሽ እንደሚሆን ልብ ልንል ይገባል።

 

“ኢትዬጵያ በልጆቿ አንድነትና ትግል ታፍራና ተከብራ ለዘላለም ትኑር”

 

ከአበባየሁ አሉላ

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.