<<በተመስገን ደሳለኝም ሆነ በሌሎች ጋዜጠኞች ላይ ለሚደርሱ ማንኛውም አይነት አደጋዎች እና ጥቃቶች መከለከያ ኃላፊነቱን እንደሚወስድ ለሕዝብ ግልጽ ማድረግ አሰፈላጊ ነው።>> (ጋዜጠኛ ተመስገን ደሳለኝ) የጄነራሉ የነፃ እርምጃ አዋጅ

Filed under: ነፃ አስተያየቶች |

በመከላከያ ሚኒስቴር የኢንዶክትሬኔሽን ዳይሪከቶሬት ዳይሪክተር ሜ/ጄ መሀመድ ተሰማ ሐምሌ 1 ቀን 2011 ዓ.ም ወቅታዊ ጉዳዮችን በተመለከተ ጋዜጣዊ መግለጫ መስጠታቸው ይታወቃል፡፡ በርካታ ጉዳዮችንም አንስተው ለማብራራት ሞክረዋል፡፡

በርግጥ የጄነራል መሀመድ መልዕክት ማጠንጠኛ የ‹መከላከያን ስም የሚያጠፉ›፣ ‹አመራሩን እና ሰራዊቱን ለማራራቅ የሚያሴሩ› ጋዜጠኞች እና ሚዲያዎችን ሰራዊቱ አሳድዶ በነፃ እርምጃ እንዲደመሰስ መፈቀዱን ‹ማብሰር› እንደ ነበረ ፕሮግራሙን የተከታተሉ በሙሉ የሚረዱት እውነታ ነው፡፡ ከዚህ ቀደም በነበሩ የተቋሙ መሪዎች በአደባባይ (በሚዲያ) ሲነገሩ ያልተደመጡ ክብረ-ነክና ኃይለ ቃሎችንም ተጠቅመዋል፡፡

‹ዋልታ ቲቪ› እንደ ሌሎቹ የቴሌቪዥን ጣቢያዎች ሳይቆራረጥ ሙሉውን ባስተላለፈው የጄነራሉ መግለጫ ላይ የ‹ፍትሕ መጽሔት› ማኔጂንግ ኤዲተር ተመስገን ደሳለኝን አራት ጊዜ በስም ጠቀሰው በተራ ቃላቶች ከመሳደብ እና ከመዝለፍም በዘለለ፤ ‹የተናደደ ወታደር ለሚወስደው እርምጃ ኃላፊነት የለብንም› በሚል ሽፋን ሰራዊቱ ወታደራዊ እርምጃ እንዲወስድበት የግላጭ ትዕዛዝ አስተላልፈዋል፡፡ መከላከያ ሠራዊት የዜጎችን አንገት መቀንጠስ እንደሚችል በይፋ አስረግጠዋል፡፡ ጉዳዩን አስገራሚ ያደረገው ደግሞ በሕግ ለመጠየቅ ዝግጅታቸውን እየጨረሱ እንደሆነ በመናገር በፍትሕ ስርዓቱ ላይ መሳለቃቸው ነው፡፡

ጄነራሉ ጋዜጠኞችን እና ሚዲያዎችን በጅምላ በስሁት ፖሮፓጋንዳ ለማሸማቀቅ መሞከራቸው ሳይዘነጋ፤ እንደ ቀይ እና ነጭ ሽብር ዘመን ነፃ እርምጃን ለሚመሩት ሠራዊት መፍቀዳቸው ከአንድ ግለሰብ ነፍስ በላይ ትኩረት ሊሰጠው የሚገባ ነው፡፡ ወታደሩ የፈለገውን እርምጃ ወስዶ፣ ‹መናደዱን› እንደ ምክንያት መጥቀስ ብቻ በቂ ነው በሚል ጄነራል መዳፍ ላይ የአገሪቱ ዕጣ-ፋንታ ወድቋል፡፡ ሁነቱ የፍትሕ ሥርዓቱን የናቀ፣ ለራሱ ለመንግሥትም ስጋት የሚፈጥር፣ ሀገራዊ ቀውስ የሚያነብር፣ ለፖለቲካ ምስቅልቅሎሽ መግፍኤ የሚሆን አደገኛ አደጋ የተሸከመ ነው፡፡ የጄነራል መሀመድ አካሄድ፣ የጄነራል ሰዓረ ገዳይ ምናልባት ከደረሰበት ጉዳት መዳን ከቻለ እና ፍርድ ቤት ከቀረበ ‹ሰዓረን የገደልኩት ስላናደደኝ ነው› የሚል ቃል ሰጥቶ በነፃ መሰናበት የማለት ያህል ነው፡፡ ‹የጋዜጠኛ ደም ከወታደር ይቀጥናል› ካልተባለ፡፡ ይህንን ጉዳይ ከግድያው አኳያ ተቋሞ ሰፋ ያለ ምርመራ እንዲያደርግበት ይመከራል፡፡ (ጄነራሉ የአክራሪ ሽብርተኞችን አሰራር በመዋስ በጋዜጠኛ ተመስገን ደሳለኝ ላይ ሰራዊቱ ባገኘው ቦታ እርምጃ እንዲወስድበት ያስተላለፉት መልእክት የተቋሙን አመራሮች በተመለከተ ከዚህ ቀደም ያዘጋጀናቸውን ዘገባዎች እውነታነት የሚጠናክር እንደሆነም ልብ ይሏል)

በጥቅሉ የጄነራል መሀመድ ተሰማ መልዕክት ‹የአገሪቱን ሕግ በግላጭ የናደ› ብቻ ተብሎ በቸልታ የሚታለፍ አይደለም፡፡ በርከታ የታፈኑ እውነታዎች መኖራቸውንም ይጠቁማል፡፡ በተለይ የተወሰኑ የጦር መኮንኖችን ተንተርሶ በሕዝባችን ዘንድ በስፋት ሲወሩ የነበሩ አደገኛና ሕገ-ወጥ ተግባሮች ለመፈፀማቸው ምልክት የሰጠ ነው፡፡ የሃላፊው ንግግር እግረ መንገዱን ተቋሙ ‹አስተዳድረዋለሁ› የሚለውን ሰራዊት ‹ንዴት› መቆጣጠር እንደተሳነው፣ ዲስፒሊን እንደጠፋ፣ ሕግ የሚያከብር ወታደር እንደሌለ ከመመስከሩም በላይ፤ አገሪቷ ያለችብትን የፍርሰት ጠርዝም ጠቁሞ አልፏል፡፡

ጄነራል መሀመድ የመከላከያ ሰራዊት አባላት በ‹ተናደዱ› እና በ‹ተበሳጩ› ቁጥር በፈለጉት ዜጋ እና ግብር ከፋይ ተቋማት ላይ እርምጃ የመውሰድ መብት ማን እንደሰጣቸው ግልጽ ባያደርጉም፣ የሕግ የባላይነትን የገረሰሰ፣ የመንግሥትን ህልውና የካደ፣ ሥርዓት አልበኝነትን የፈቀደ ትዕዛዝ ማስተላለፋቸው አከራካሪ አይደለም፡፡ በአገሪቱ ሕግ ተመዝግቦ እና ፍቃድ ተሰጥቶት በሚሰራ ሚዲያ ላይ በታተመ ሂስም ሆነ፣ በተጋለጠ መረጃ ‹ጉዳት ደረሰብኝ› ባይ አሳማኝ ማስረጃ እስካቀረበ ድረስ በፕሬስ አዋጁ›ም ሆነ በ‹ወንጀለኛ መቅጫ ሕጉ› ፍትሕ ማግኘት እንደሚችል በዝርዝር መቀመጡ ይታወቃል፡፡ ይሁንና ጄነራል መሀመድ እንደ ቀይና ነጭ ሽብር ዘመን ሰራዊቱ በ‹ተበሳጨ› ቁጥር ነፃ እርምጃ እንዲወስድ መንግሥታዊ ሚዲያዎችን ተጠቅመው ፍቃድ እስከ መስጠት መድፈራቸው ከኢትዮጵያውያንም ባሻገር አለም አቀፍ ማኀበረሰቡን ጭምር አስደንግጧል፡፡ የጋዜጠኞች መብት ተሟጋቹ ድርጅት ሲ.ፒ.ጄ እና የሰብአዊ መብት ተከራካሪው አምንስቲ መግለጫውን በቅድሚያ ያወገዙ ኢንተርናሽናል ተቋማት ናቸው፡፡

ከእጅ ወደ አፍ በሆነ ደሞዝ የህይወት መስዋእትነትን በሚጠይቅ ሙያ የተሰማራውን፣ ችግር ያቆራመደውን፣ በአድሎኛ አዛዦች የተገፋውን ሰራዊት፣ ‹ገመናዬ ተጋለጠ› በሚል ግላዊ-ሰበብ በመሀል ከተማ በሚኖሩ ዜጎች ላይ የፈቀደውን እርምጃ እንዲወስድ ማዘዝ (ማነሳሳት) በነፍሰ-ገዳይነት የሚያስጠይቅ ከባድ ወንጀል በመሆኑ፣ የመከላከያ ኃላፊዎች የጄነራል መሀመድ አቋም ተቋሙን የማይወክል እና ያልመከሩበት ከሆነ የፋሽስት ኢጣሊያ ወኪል ጄነራል ግራዚያኒ በአዲስ አበባ ሕዝብ ላይ ያወጀውን አይነት ነፃ እርምጃ በፈቀዱት ጄነራል ላይ ሕጋዊ እርምጃ በመውሰድ የዜጎችን ደህንነት የማስጠበቅ ግዴታቸውን በመወጣት ሊያረጋግጡልን ይገባል፡፡ በተጠላው እና መከራን ባዘነበው ዘመነ-ሕወሓት የነበሩ የጦር መኮንኖች እንኳ ቢያንስ በሚዲያ ይህንን የመሰለ ድፍረት እና ማን-አህሎኝነት ሲያሳዩ አልተመለከትንም፡፡

ከቅርብ ጊዜ ወዲህ አገሪቱን ለአልቦ-መረጋጋት፣ ሕዝብን ለሰቆቃ የዳረገውን አይነት የመንጋ ፍርድ ከደርግ እስከ ኢሕአዴግ ካገለገለ ወታደር የሚጠበቅ አልነበረም፡፡ (ጄነራል መሀመድ ተሰማ በኮለኔል መንግሥቱ ኃይለማርያም ዘመን ኢትዮጵያን ከሻዕቢያ የመገንጠል ተልእኮ እና ከወያኔ የዘረኝነት ፖለቲካ እንዲከላከሉ በወታደርነት ሰልጥነው፣ በባንዲራው ስም ቃለ-መሀላ ፈፅመው ወደ ጦር ግንባር ከተላኩ በኋላ፣ በምርኮ ይሁን በወዶ-ገብነት ባይረጋገጥም የጠላትን ጎራ ተቀላቅለው በአሁኑ ወቅት ለደረሱበት ከፍተኛ ወታደራዊ መኮንንነት መብቃታቸው ይታወሳል፡፡) ዛሬ በእድሜም ሆነ በልምድ በስለው የተዛነፈውን ለማስተካከል፣ የተጣመመውን ለማቃናት፣ የተቀደደውን ለመድፈን… ባይችሉ እንኳ፣ ጋዜጠኛ በአደባባይ እንዲገደል እስከማዘዝ የደረሰ ‹ጥፋት ሊፈጽሙ ይችላሉ› ተብሎ አይጠበቅም ነበር፡፡ የሆነው ግን ይህ ነው፡፡

ጠቅላይ ሚንስትርም ሆነ የጦር አዛዥ፣ ወታደርም ሆነ ወዝ-አደር፣ ጋዜጠኛም ሆነ ቲያትረኛ፣ አርሶ አደርም ሆነ አርብቶ አደር፣ መንፈሳዊም ሆነ መናፍቅ፣ ነጋዴም ሆነ መደዴ… በሕግ ፊት ዕኩል ነው የሚለው የፍትህ ሥርዓቱ አዓማድ የማክበር ግዴታ ጄነራሉንም እንደሚጨምር ማስታወሰ ያስፈልጋል፡፡

በተመስገን ደሳለኝም ሆነ በሌሎች ጋዜጠኞች ላይ ለሚደርሱ ማንኛውም አይነት አደጋዎች እና ጥቃቶች መከለከያ ኃላፊነቱን እንደሚወስድ ለሕዝብ ግልጽ ማድረግ አሰፈላጊ ነው።

ዶ/ር ዐቢይ አህመድ ወደ ሥልጣን ከመጡ በኋላ ሰራዊቱ ላይ የተሳካ ‹ሪፎርም› እንዳካሄዱ ቢናገሩም፣ መሬት የረገጠው እውነታ የተለየ እንደሆነ በማስረጃዎች የተደገፉ ክፍተቶችን በ‹ፍትሕ መጽሔት› በማቅረብ የእርምት እርምጃ እንዲወስድ ለመጠቆም እንደ ተሞከረ አንባቢን ያስታውሳሉ፡፡

2 Responses to <<በተመስገን ደሳለኝም ሆነ በሌሎች ጋዜጠኞች ላይ ለሚደርሱ ማንኛውም አይነት አደጋዎች እና ጥቃቶች መከለከያ ኃላፊነቱን እንደሚወስድ ለሕዝብ ግልጽ ማድረግ አሰፈላጊ ነው።>> (ጋዜጠኛ ተመስገን ደሳለኝ) የጄነራሉ የነፃ እርምጃ አዋጅ

  1. ወታደራዊ ስነምግባርና ደንብ ያለባት ሃገር ብትሆን ኑሮ ይህ ጄኔራል ተብዪ ወስላታ እንዲህ በግልጽ ሰውን ለሞት እየጋበዘ በስራው ላይ መቆየት ባልቻለም ነበር። ግን የሃበሻው ምድር በወስላቶች የታጠረች ናት። ጠበንጃ በማንገታቸው ብቻ ዓለምን እንደሚገዙ የሚቆጥሩ እነዚህ የስም ጄኔራሎች በየጊዜው የሚሰጡት መግለጫ ማን አለብኝ አይነትና ከወታደራዊ አሰራር እና ዲሲፒሊን የወጣ ነው። የተማረ፤ ፍትሃዊ እይታ የገባው የወታደር መኮነን በመረጃ የቀረበውን የጋዜጠኞች የፓለቲካ ትንተና በመመልከት አስተማሪ የሆኑ ጠቋሚ እይታዎችን በመልቀም ሌላውን መተው በቻለ ነበር። ይህ ግን የተለመደ አሰራር አይደለም። መደንፋት፤ ዘለፋ፤ በሌላው ላይ ሰቆቃ ለማድረስ መዛትና በሏቸው ብሎ ለወሮበላ አሳልፍሮ መስጠት በሃገሪቱ የተለመደ ሆኗል።
    የአሰራር ክፍተቶችን የሚያመላክት ጽሁፍ የሚያቀርቡ ሰዎችን አግልሎና አስፈራርቶ በቄሮ ስም ቋንጭራና ምስማር የተመታ ጣውላ በመያዝ አዲስ አበባ የእኛ ብቻ ናት የሚለውን ሃሳብ ያነገቡ የጠባብ ብሄርተኞችን እይታ የሚደግፍ ወይም እንዳላየ አይቶ ዝም የሚል የደህንነትና የመከላከያ ሃይል ወደ ተሻለ የሃሳብ እምርታ ይሸጋገራል ብሎ ማመን ይከብዳል። ሌላው ዓለም Speace Force (የህዋ ሃይል) ለመመስረት ሌት ተቀን ሲታገል በዘርና በጎሳ በቋንቋና በብሄር እይታ የተዋቀረው የሃበሻው ሰራዊት ጊዜውን የሚያሳልፈው ራሱ የጫረውን እሳት ሲያጠፋ ወይም ዞሮ ብሎ ሌላ ሲለኩስና የእውነት ሃይሎችን ሲያፍንና ሲያሳድድ ነው። ትላንትም ስብሰባ ዛሬም ስብሰባ ነገም ስብሰባና ፍሬ የለሽ ዲስኩር ብቻ የፈላባት ይህች መከረኛ ሃገርና ህዝቦቿ በወታደራዊ አመራርና አወቃቀር ላይ ሪፎርም ተሰርቷል የተባልነው እንዲህ ዓይነት የወሮበላ ንግግር የሚያደርጉ ጄኔራሎችን አመራር ላይ አስቀምጠን ነው። ይገርማል.. ድንቄም ጄኔራል ድንቄም ሪፎርም። አዝናለሁ በዚህና በመሰል ጄኔራሎች አመራር ስር ለወደቁ የእውነተኛ የሃገሪቱ ወታደሮች። መቼ ይሆን የመጠላለፍ ፓለቲካ የሚያበቃው።

    Tesfa
    July 14, 2019 at 6:26 am
    Reply

  2. This is one of the most bizarre and extraordinary press conference i have ever heard from a senior general in any country which is considered governed by the rule of law. General Mohammed Tessema’s statement against one of the most respected and brave journalist in Ethiopia Temesgen Desalegn was inappropriate and even scary. The General’s direct comment about the possibility of an angry soldier killing Temesgen because of his continuous journalistic endeavor in commenting and investigating matters related to the military and the current government in Ethiopia was unwarranted and contradict with the Ethiopian people wish in reforming and establishing a democratic system in the country. First of all Temesgen Desalegn is a person who sacrificed a lot during the TPLF’s twenty seven years dictatorship by writing against the Meles regime on his newspapers. As we all know that lead Temesgen to imprisonment and sufferings during the TPLF’s regime. Unlike General Mohammed Tessema and his civilian bosses Journalist Temesgen was the one who made all sacrifices to change the lives of all Ethiopians. The General’s comment also highlights a state of utter confusion and lack of strong leadership by the current prime minister and his Defence minister. Ethiopia’s prime minister looks like weak and lost control of the country, the military and his rouge generals. That is why the country and its people seem lost any confidence in the current prime minister who seems unable to lead the country in the right path. One thing i have to say to Temesgen Desalegn and his fellow brave journalist Eskinder Nega is both of you stand on the right side of history and all Ethiopian people are with you like they stand with you in the past. To rouge elements such as General Mohammed Tessema and the Addis Abeba city mayor what i have to say is you can’t achieve your desired aim of staying on power by threatening, harassing, and bullying brave journalists such as Temesgen and Eskinder who only uses their pen and paper in highlighting the country’s serious problems.

    Girma
    July 14, 2019 at 10:35 am
    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.