ዓለማችን በኢትዮጵያ ላይ ማላገጧን ቀጥላለች! – አምባቸው ደጀኔ (ከወልዲያ)

Filed under: ነፃ አስተያየቶች |

እኛ “ቁንጅና እንደተመልካቹ ነው” የምንለውን እነሱም “Beauty lies in the eyes of the beholder.” ይሉታል፡፡ አዎ፣ አንድን ነገር የምታይበት አቅጣጫና ልታሳካ የምትፈልገው በጎም ሆነ ክፉ ዓላማ መላ እንቅስቃሴዎችህንና ድርጊቶችህን ይወስናል፡፡ ላንዱ ሸፋፋ የሆነ ለሌላው ቀጥ ያለ ሊመስል(ሊሆን) ይችላል፡፡

ሀገር እዚህ ትተረማመሳለች፡፡ እዚያ ጋ ደግሞ የኖቤል ሽልማት ይሰጠናል፡፡ ይህ መልእክት “በርቱና ተጨራረሱ” የሚል ማበረታቻ ይመስላል፡፡ ይህ እውነት በራሱ አወዛጋቢ ነው – እንደተመልካቹ፡፡

በተመሳሳይ ቀን የተፈጠሩ ሁለት ሰበር መረጃዎችን ልግለጽ፡፡ አንደኛው የጠ/ሚ አቢይ የኖቤል ሽልማት አሸናፊነት (ልብ አድርጉ – ሊያውም በሰላም!) ሲሆን ሌላው ከአማራ ክልል ወደ አዲስ አበባ የሚመጡ የሕዝብ ማመላለሻ አውቶቡሶች ጎሐ ጽዮን አካባቢ በቄሮዎች ታግተው መዋልና በየመንገዱ ማደር ነው፤ ምክንያቱ ሲጠየቅ ደግሞ “የነገ እሁዱን የባልደራስ ሰልፍ ለመሳተፍ ‹ብዙ ወጣቶች ከአማራው ክልል ወደ ‹ፊንፊኔ› እየጎረፉ ነውና ያንን ማስቆም አለብን› ብለው ነው” የሚል ነው፡፡ ለበቀደሙ የእሬቻ በዓል ከምድረ ኦሮሞ አካባቢ ያ ሁሉ ቄሮ ሲመጣ ግን አንድም ሰው ዝምባቸውን እሽ ያለ አልነበረም – ጥጋብ ማለት አንዱ መገለጫው ይሄ ነው፡፡ ለመቻቻልና ለመከባበር ተብሎ እንጂ ሁከት መፍጠር ቢታሰብና ቢፈለግ ኖሮ አንድ ሰውም ቢሆን በቂ ነው፡፡ አምስት ሰዎች ተዓምር መፍጠር ይችላሉ፤ ደግሞ ለሁከት! ፍቅር ግን ከሁሉም ይበልጣል፡፡ ከቆሻሻ ገንዳ የተጣለን ሕጻን አንድ ውሻ በአፉ አንጠልጥሎ በፍቅር ወደ ሰዎች ቢያመጣው ያ ልጅ የሀገር መሪም መሆን ይችልና ሀገርን ከውድመት ሊታደግ ይችላል፡፡ ለዚህም ነው በፍቅር እንጂ በጠብ ሰውን በማሸነፍ አወንታዊ ዕድገትና ብልጽና ማስመዝገብ የሚያቅተን፡፡ በጥፋት የተጀመረ ማለቂያውም ያው ጥፋት ነው፡፡

እጅግ በርካታ አውቶቡሶች ከዐባይ ድልድይ እስከ ጎሐ ጽዮን ከዚያም በኋላ ባሉ ከተሞች ወደ አዲስ አበባ እንዳይገቡ በመታገዳቸው ተሣፋሪዎች ለተጨማሪ ወጪና እንግልት ተጋልጠው በየትናንሽ ከተሞች እንዲያድሩ ተገደዋል፡፡ አሁን በደረሰኝ መረጃ ደግሞ ወደ ደጀን ተመልሰው እዚያው እንዳደሩና እስከአሁኒቷ ቅጽበት (ቅዳሜ ጥቅምት 1 ቀን 2012 እኩለ ቀን ነው አሁን) በዚያቸው ከተማ እየተጉላሉ ናቸው፡፡ የከተማው ሕዝብ ግን እጅግ የሚያስደንቅ ሥራ እየሠራ ነው፡፡ ከየቤቱ እህል ውኃ በማምጣት ተሣፋሪዎችን እየመገበና እያጽናና እንደሚገኝ በስልክ ግንኙነት መረዳት ችያለሁ፡፡ ድርድሩ ካልተሳካም ወደ ባህር ዳር የመመለስ ወሬም አለ፡፡ አሁን በደረሰኝ መረጃ ደግሞ እገታው በጎጃም መስመር ብቻ ሣይሆን በደብረ ብርሃንና በሌሎች አማራ ወደ አዲስ አበባ ይገባባቸዋል ተብለው በሚጠረጠሩ ሥፍራዎችም እንደሆነ ሰማሁ፡፡ ሰውዬው “ግልጽ ጦርነት እንገባለን” ያለውን በተግባር እያሳዬ ነው – የሰላም ኖቤል ተሸላሚው፤ በጣም ጀግና ነውና! ማፈሪያ፡፡ (በአሁኑ ወቅት ኢንተርኔት በቅጡ እየሠራ አይደለም፤ ባንኮች በኔትወርክ ጥርዥ ብርዥ ማለት ምክንያት ተጨናንቀዋል፡፡ ሠልፉ ለጉድ ነው፡፡ እኔ ራሴም ይቺን ጽሑፍ ለመላክ በጣም ተቸግሬያለሁ፡፡ እየተመላለስኩ የማርማት ኔትወርክ እስኪመጣልኝ ነው፡፡)

በነገራችን ላይ ይህን ድፍረት የተሞላበት ድርጊት ለመፈጸም ትዕዛዙ ከጃዋርና መሰል አክራሪ ኦሮሞዎች ሊፈልቅ ቢችልም ካለ ዶ/ር አቢይና ቡድኑ ቡራኬ እውን ሊሆን እንደማይችል መታወቅ አለበት – በጭራሽ፡፡ ይህ ልጅ መልካም መልካም ተግባራትን ለራሱ በመሳብ ክፉ ክፉዎቹን እርሱ ራሱ ዐቅዶ ቢተገበሩም እንኳን ወደፈረደባቸውና ክፉ ተግባር ወደሚያምርባቸው አማካሪዎቹ አክራሪ ኦሮሞዎች ማላከክን ሥራየ ብሎ ተያይዞታል፡፡ እንጂ በራሱ አስተዳደር ይህን የመሰለ የጭቡ ሥራ ሲሠራ ከርሱ ባርኮት ውጪ እንደማይሆን ሁላችንም የማናምን ጅሎች ከመሰልነው ጅሉ ራሱ ነው ፡፡ … ለማንኛውም ይህ ሁሉ ቲያትር እየተከናወነ ያለው ታታሪው መሪያችን የሰላም የኖቤል ሽልማት ባገኘበት ዕለት መሆኑ ይህን ልዩ ቀን በድምቀት ለማሰብ በኦህዲድና ኦነግ ታልሞ መሆን አለበት፡፡ በዕንቆቅልሽ የተሞላች ዓለም፡፡ በዕንቆቅልሽ የተምበሸበሸች ኢትዮጵያ፡፡

በመሠረቱ ዶ/ር አቢይ በመሸለሙ የተሰማኝ ነገር የለም፡፡ የብዙዎችን ስሜት እንደምጋራ አምናለሁና ነገሩ የማይሞቀን የማይበርደን ሰዎች እንደምንኖር ግልጽ ነው፡፡ የማይሞቀን በሀገራችን ውስጥ እየተፈጸመ ያለውን ኦነግ ኦህዲዊ አጠቃላይ ደባና ተንኮል ስለምንረዳ ነው፡፡ የማይበርደን ሰውዬው ባሳየው “ለቤት ቀጋ፣ ለውጭ አልጋ”ዊ የማይናቁ ተግባራት ይህን ሉሲፈር-ቀመስ ሽልማት ቢያገኝ በተለይ የሀገራችንን ስም ከማስጠራት አኳያ አወንታዊ ጎን ስላለውና “ምቀኞች” ላለመባልም ጭምር ነው፡፡ እንጂ በአክራሪ ዘረኛ ኦሮሞዎች ሀገር ከራስጌ እስከ ግርጌ እየተወረረች ኦሮሞ ያልሆኑ ዜጎችም ከሥራም ከመኖሪያ ቦታም ከሥልጣንም ከርስትም ከሀብትም በገፍና በግፍ እየተፈናቀሉ በሚገኙበት ሁኔታ ይህን ሽልማት መደገፍ የፍትህን ዐይን በጋሬጣ እንደመደንቆል ነው፡፡

በአንድ ሀገር ውስጥ ሁለት ሀገር ወይም መንግሥት ሊኖር አይችልም – እንደመጽሐፉ ለሁለት ጌቶች መገዛት የማይቻልም በመሆኑ፡፡ ዶ/ር አቢይም የጭንቅና የጣር ቀን በርሱ ላይ ከመምጣቱ በፊት (እስካሁን ካልመጣ(በት)) ከሁለቱ አንዱን መምረጥ ይኖርበታል፡፡ ሕዝብን ማስፈጀትና ማሰቃየት የለበትም፡፡ አንድም የ16ኛውን ክፍለ ዘመን የኦሮሞ መስፋፋት (Oromo Migration or Invasion?) በሚያስንቅ መልክ ሌት ተቀን እየተሠራ የሚገኘውን ሁሉንም ነገር ኦሮሞና የኦሮሞ የማድረግ ዘመቻ አስቁሞ ለሁላችን የሚሆን ሥርዓት መዘርጋት አለበት፡፡ አለበለዚያ “እነዚህን ሰዎች አልቻልኳቸውም፣ ቀን ስክብ የዋልኩትን (ሲክብ ከዋለ!) ማታ ይንዱብኛል” ብሎ አንዳች ሀገራዊ መፍትሔ ማፈላለግ ይኖርበታል – በርግጥም የሰላም ኖቤል ተሸላሚ ከሆነ፡፡ ይቺ “ቢያዩኝ እስቅ ባያዩኝ እሰርቅ” ዓይነት የጨላጣ ዱርዬና ሌባ አካሄድ ብዙ ርቀት አታስኬድም፡፡ የዕድል ጉዳይ ሆኖ እንጂ እንዲያውም እስካሁንም ድረስ መጓዟ የሚገርም ነው፡፡ በተጨማሪም መናፈሻና ቤተ መንግሥትን ለቱሪዝም መስህብነት ማዘጋጀት መልካም መሆኑ እንዳለ ሆኖ ለድሃው ሕዝባችን ግን ለጊዜው ጠብ የሚልለት ነገር አልተገኘም፤ ሰላምም አጥተን ኅልውናችን አደጋ ላይ ወድቋልና አቢይ ይህን ጉዳይ አይዘንጋው፡፡

የዛሬ ስንት ዓመት ገደማ ያራ ፋውንዴሽን የተባለ የማዳበሪያ ነጋዴ ድርጅት ለመለስ ዜናዊ 200 ሽህ ዶላር አካባቢ ሸልሞት ነበር፡፡ በወቅቱ ያ ሽልማት የተገኘው በሎቢ(በሸልሙልን ውትወታ) እንደሆነም ሰምተናል፡፡ ያልተገባ ነገር ሰዎችን እንዴት ሊያስደስታቸው እንደሚችል ሁሌም ይገርመኛል፡፡ ትንሽነት ነው፡፡ የአእምሮ መጫጫት ውጤት ነው፡፡ በዚህ ዓይነቱ ሥነ ልቦናዊ ደዌ የተመቱ ደግሞ እጅግ ብዙ ናቸው፡፡

ከዚህ በሽታ ለመፈወስ ጤናማ አስተሳሰብና አመለካከት እንዲኖረን መጣር ነው፡፡ “የሰው ወርቅ አያደምቅ” ይባላል፡፡ በጎመን የሚደልሉት ሆድ አቀበትን ላለመውጣት ለሚለግም ጉልበት ያጋፍጥና ትንሽ ሮጦ ካሰቡት ግብ ሳይደርሱ ባጭር መቅረት የማያመልጡት ክፉ ዕጣ ይሆናል፡፡ የኛ በልሆነ ነገር መደሰትን እንጠየፍ – በምናምነው ይሁንብን፡፡

ስለዚህ እባካችን ወገኖቼ – የኛ ያልሆነን ነገር በማግባባትም ይሁን በገንዘብ፣ በ“ፎርጅድ”ም ይሁን በ“ፌክ” በምንም ዓይነት ህገ ወጥና የኅሊናን ሚዛን ባልጠበቀ ሁኔታ የኛ በማድረግ ከመደሰትና በመከነ አስተሳሰብም ሰዎችን ከመበደል እንቆጠብ፡፡ ሁሉም ቀሪ ነው፡፡ አሥር ፒኤች ዲ ቢኖርህ አንዱንም ይዘኸው አትቀበርም፡፡ 100 ቢሊዮን ዶላር ቢኖርህ ድምቡሎ አብራህ አትቀበርም – ከመቀበርህ ቤተሰቦችህ እስከሕይወታቸው ህልፈት እየተቧቀሱ ይራኮቱባታል እንጂ፡፡ ሰማይንና ምድርን የሚያንቀጠቅጥ ሥልጣን ቢኖርህ ስትሞት ግን የምሥጥ መጫወቻ ነህ፡፡ በቁንጅናና ውበትሽ ሽዎችን የምታማልይ ብትሖኚ ስትሞች ግን የሉሲን ዐጽም አስታውሽ – በቃ ልክ እንደርሷው ነሽ – ፈርተው ይሸሹሻል እንጂ አይጠጉሽም፡፡ ታዲያ በዚህች መከረኛ ምድር መጽናኛችን ምንድን ነው? …. ከመቃብር በላይ ለሚቆም መልካም ተግባራት ብንተጋ ግን ትውልድ አይረሳንም፡፡

በላባችንና በጥረታችን ላልመጣ የማይገባን ነገር አንማረክ፡፡ በሀሰት የትምህርት መረጃ ዶክተሮች፣ ኢንጂነሮች፣ ባለኤምኤና ቢኤ ዲግሪ ባለቤቶች የሆኑ በዓለማችን እጅግ ብዙ ዜጎች አሉ፡፡ በነዚህ ሰዎች ምሥኪኗ ዓለማችንም እነሱም ያሳዝናሉ፡፡ ከነዚህም ሰዎች አንዱ የቀድሞው የኡጋንዳ መሪ አንዱ ነው – ፊልድ ማርሻል፣ ሼክ ዶክተር የዓለም ሎሪየት ፓትርያርክ ወኢማም  የዕድሜ ልክ ፕሬዝደንት ዘኡጋንዳ፡፡ እንደነዚህ ያሉ ዜጎች የአመራሩን ቦታ ሲጨብጡ ሀገርም እንዴት ልታብድ እንደምትችል አስቡት፡፡ ይህች ጽሑፍ ስሙ ካልተዘነጋኝ ለ“ኢንጂኔር ዶክተር” ሣሙኤል ትሁንልኝ፡፡

“ሌተናል ጄኔራል ዶክተር ኢንጂኔር” አምባቸው ደጀኔ (ከወልዲያ) – ማዕረግ ግን ደስ ሲል!

 

 

3 Responses to ዓለማችን በኢትዮጵያ ላይ ማላገጧን ቀጥላለች! – አምባቸው ደጀኔ (ከወልዲያ)

  1. ሥንተዜ ኤዲት ሣደርግ ልብ ያላልኩት አንድ መሠረታዊ ስህተት አሁን ሣነብ አየሁ፣ እርሱም የዩጋንዳን መሪ አለመጥቀሤ ነው – ብዙዎች ቢያውቁትም ኢዲያሚን ዳዳ ይባላል። ከይቅርታ ጋር። ይቺ ባቄላ ካደረች … እንዲሉ የኛዋ ባለኖቤልም ገና ካሁኑ የዚሁ አምባገነን መሪ ጠባይ እንዳላት ይወራላታል። አንድዬ ይጠብቀን።

    Avatar for Ambachew Dejene

    Ambachew Dejene
    October 12, 2019 at 2:59 pm
    Reply

  2. Ethiopian government in early 1998 was best friends with the Eritrean government. Within a matter of few months Eritrean government became worst enemies with the Ethiopian government.
    Unless the core reason of the Ethio-Eritrean war is adressed not one but hundreds of peace prizes do not bring lasting peace between the two countries. Both sides need to figure out what it was that turned the best of friends relationship they had into the worst of enemies that quick , then both countries leaders must instill in themselves and in their whole countries people to do a conscious effort for the reason that brought the Ethio Eritean war doesn’t happen again.

    Sugar-coating the real reason of why the Ethio-Eritrean war started, by saying the reason was the two cousins family feud (Meles Zenawi’s and Isayas Afeworki’s) personal feud war or border war over Badme, is not the way peace is achieved.

    The real truth of why the war started need to be addressed.

    Avatar for Dagmawit

    Dagmawit
    October 13, 2019 at 3:29 am
    Reply

  3. Prize of peace to Dr Abyi would rather be givenby Ethiopian people themsleves …. Zero trust on prizes coming from Western countries …..we all really understood what is going on in our country and how the external force manupilate the current Easter African political situation .

    Fake testimony from Oslo!

    Avatar for Wendem agegne merso

    Wendem agegne merso
    October 18, 2019 at 8:35 am
    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.